ਅਕਾਲੀ ਦਲ ਨੂੰ ਝਟਕਾ ਸਰਵਣ ਸਿੰਘ ਫਿਲੌਰ ਸਾਥੀਆਂ ਸਮੇਤ ਕਾਂਗਰਸ 'ਚ ਸ਼ਾਮਲ

 ਅਕਾਲੀ ਦਲ ਨੇ ਮੁੱਢਲੇ ਸਿਧਾਂਤਾ ਨੂੰ ਵਿਸਾਰਿਆ –ਫਿਲੌਰ
 ਕਿਹਾ , ਅਕਾਲੀ ਦਲ 'ਚ ਮਜੀਠਿਆ ਦੀ ਸਰਦਾਰੀ
  ਛੇ ਵਾਰ ਤੋਂ ਵੱਧ ਈ.ਡੀ ਨੇ ਪੁੱਛਗਿੱਛ ਕੀਤੀ , ਕੁੱਝ ਨਾ ਮਿਲਿਆ ੇ
ਚੰਡੀਗੜ 18 ਨਵੰਬਰ ( ਜੈ ਸਿੰਘ ਛਿੱਬਰ) : ਅਕਾਲੀ ਦਲ ਨੂੰ ਵੱਡਾ ਝਟਕਾ ਦਿੰਦੇ ਹੋਏ ਕਰਤਾਰਪੁਰ ਤੋਂ ਵਿਧਾਇਕ ਸਰਵਣ ਸਿੰਘ ਫਿਲੌਰ ਆਪਣੇ ਸਾਥੀਆਂ ਸਮੇਤ ਅੱਜ ਕਾਂਗਰਸ ਵਿੱਚ ਸ਼ਾਮਲ ਹੋ ਗਏ। ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ, ਕੁੱਲ ਹਿੰਦ ਕਾਂਗਰਸ ਦੀ ਜਨਰਲ ਸਕੱਤਰ ਆਸ਼ਾ ਕੁਮਾਰੀ ਦੀ ਹਾਜ਼ਰੀ 'ਚ ਕਾਂਗਰਸ 'ਚ ਸ਼ਾਮਲ ਹੋਏ ਸਰਵਣ ਸਿੰਘ ਫਿਲੌਰ ਨੇ ਕਿਹਾ ਕਿ ਅਕਾਲੀ ਦਲ ਆਪਣੇ ਮੁੱਢਲੇ ਸਿਧਾਤਾਂ ਤੋਂ ਥਿੜਕ ਗਿਆ ਹੈ ਅਤੇ ਅਕਾਲੀ ਦਲ 'ਚ ਹੁਣ ਬਿਕਰਮ ਸਿੰਘ ਮਜੀਠਿਆਂ ਦਾ ਦਲ ਬਣ ਗਿਆ ਹੈ। ਕੈਪਟਨ ਦੀ ਰਿਹਾਇਸ਼ 'ਤੇ ਪੱਤਰਕਾਰਾਂ ਨਾਲ ਗਲਬਾਤ ਕਰਦਿਆਂ ਸ੍ਰੀ ਫਿਲੌਰ ਨੇ ਕਿਹਾ ਕਿ ਉਹ ਛੇ ਵਾਰ ਵਿਧਾਇਕ ਰਹੇ ਹਨ ਪਰੰਤੂ ਦਲਿਤ ਹੋਣ ਦੇ ਨਾਤੇ ਉਹਨਾਂ ਦੀ ਸੀਨੀਅਰਤਾ ਨੂੰ ਨਜਰ ਅੰਦਾਜ ਕਰਕੇ ਨੀਵਾਂ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਰਹੀ ਹੈ। ਸ੍ਰ ਫਿਲੌਰ ਨੇ ਕਿਹਾ ਕਿ ਇਨਫੋਰਸਮੇਂਟ ਡਾਇਰੈਕਟੋਰੇਟ (ਈਡੀ) ਨੇ ਛੇ ਤੋਂ ਵੱਧ ਵਾਰ ਉਹਨਾਂ ਦੇ ਬਿਆਨ ਲਏ ਪਰ ਉਹਨਾਂ ਦੇ ਖਿਲਾਫ ਇੱਕ ਵੀ ਦੋਸ਼ ਸਾਬਿਤ ਨਹੀਂ ਹੋ ਸਕਿਆ ਪਰ ਜਿਹੜੇ ਲੋਕਾਂ ਦਾ ਨਾਮ ਮੁੱਖ ਦੋਸ਼ੀਆਂ ਨੇ ਲਿਆ ਉਹਨਾਂ ਨੂੰ ਈ.ਡੀ ਨੇ ਇੱਕ ਵਾਰ ਬਲਾਉਣ ਤੋਂ ਬਾਅਦ ਦੁਬਾਰਾ ਸੰਮਨ ਤੱਕ ਨਹੀਂ ਕੀਤੇ। ਸ੍ਰੀ ਫਿਲੌਰ ਨੇ ਕਿਹਾ ਕਿ ਉਹਨਾਂ ਨੂੰ ਫਿਰ ਫਸਾਉਣ ਦੇ ਯਤਨ ਕੀਤੇ ਜਾ ਰਹੇ ਸਨ ਤੇ ਕਰੀਬ ਤਿੰਨ ਹਫ਼ਤੇ ਪਹਿਲਾਂ ਈ.ਡੀ ਨੇ ਪੁਰਾਣੇ ਦਸਤਾਵੇਜ ਮੰਗੇ ਜੋ ਪਹਿਲਾਂ ਉਹ ਦੇ ਚੁੱਕੇ ਹਨ।
ਸ੍ਰੀ ਫਿਲੌਰ ਨੇ ਦਾਅਵਾ ਕੀਤਾ ਕਿ ਟਿਕਟ ਨਾ ਮਿਲਣ ਕਾਰਨ ਅਕਾਲੀ ਦਲ ਨੂੰ ਨਹੀਂ ਛੱਡਿਆ , ਪਰ ਉਹ ਦਸ ਸਾਲਾਂ ਤੋਂ ਦੇਖ ਰਹੇ ਸਨ ਤੇ ਜਦੋਂ ਹੁਣ ਸਬਰ ਦਾ ਬੰਨ ਟੁੱਟ ਗਿਆ ਤਾਂ ਉਹਨਾਂ ਕਾਂਗਰਸ ਵਿੱਚ ਸ਼ਾਮਲ ਹੋਣ ਦਾ ਫੈਸਲਾ ਕੀਤਾ ਹੈ। ਫਿਲੋਰ ਨੇ ਕਿਹਾ ਕਿ ਸੀਨੀਅਰ ਹੋਣ ਦੇ ਨਾਤੇ ਉਹਨਾਂ ਨੂੰ ਦੋ ਸੈਕਟਰ ਵਿੱਚ ਕੋਠੀ ਅਲਾਟ ਹੋਈ ਸੀ, ਸੱਭ ਤੋਂ ਪਹਿਲਾਂ ਉਹਨਾਂ ਦੀ ਕੋਠੀ ਖੋਹੀ ਗਈ, ਪਰ ਉਹ ਚੁੱਪ ਰਹੇ। ਫਿਰ ਸੀਨੀਅਰਤਾ, ਲੋਕਪ੍ਰਿਯਤਾ ਅਤੇ ਸਿਆਸੀ ਪਿੜ ਵਿਚੋਂ ਬਾਹਰ ਕਰਨ ਲਈ ਬੇਟੇ ਨੂੰ ਝੂਠੇ ਕੇਸ ਵਿੱਚ ਫਸਾਉਣ ਦਾ ਯਤਨ ਕੀਤਾ ਗਿਆ, ਜਦੋਂਕਿ ਈ.ਡੀ ਵਲੋਂ ਬਾਰ ਬਾਰ ਜਾਂਚ ਲਈ ਬਲਾਉਣ ਤੇ ਛੇ -ਛੇ ਘੰਟੇ ਪੁੱਛਗਿੱਛ ਕਰਨ 'ਤੇ ਕੁੱਝ ਵੀ ਦੋਸ਼ ਸਾਬਤ ਨਹੀਂ ਹੋ ਸਕਿਆ।
ਸ੍ਰੀ ਫਿਲੌਰ ਨੇ ਕਿਹਾ ਕਿ ਪਿਛਲੇ 40 ਸਾਲਾਂ ਤੋਂ ਦੁਆਬੇ ਵਿੱਚ ਅਕਾਲੀ ਦਲ ਲਈ ਕੰਮ ਕਰ ਰਿਹਾ ਸੀ , ਹੁਣ ਉਹ ਦੁਆਬੇ ਵਿੱਚ ਅਕਾਲੀ ਦਲ  ਦੀਆਂ ਜੜ•ਾਂ ਪੁੱਟ ਦੇਣਗੇ । ਇੱਕ ਸਵਾਲ ਦੇ ਜਵਾਬ ਵਿੱਚ ਸ੍ਰ ਫਿਲੌਰ ਨੇ ਦੱਸਿਆਂ ਕਿ ਉਹ ਮੁੱਖ ਮੰਤਰੀ ਪਰਕਾਸ਼ ਸਿੰਘ ਬਾਦਲ ਨੂੰ ਮਿਲੇ ਸਨ ਪਰਉਹਨਾਂ ਨੇ ਸੁਖਬੀਰ ਬਾਦਲ ਨਾਲ ਗੱਲ ਕਰਨ ਨੂੰ ਕਿਹਾ, ਪਰ ਸੁਖਬੀਰ ਨੇ ਵੀ ਕੋਈ ਗੱਲ ਨਹੀਂ ਸੁਣੀ। ਉਹਨਾਂ ਕਿਹਾ ਕਿ ਦਲਿਤਾਂ ਦੀ ਅਕਾਲੀ ਦਲ ਵਿੱਚ ਕੋਈ ਸੁਣਵਾਈ ਨਹੀਂ ਹੈ ਅਤੇ ਵੱਡੇ ਜਗੀਰਦਾਰਾਂ ਦੇ ਹੇਠਾਂ ਦਲਿਤ ਵਿਧਾਇਕਾਂ ਨੂੰ ਕੰਮ ਕਰਨ ਲਈ ਮਜਬੂਰ ਕੀਤਾ ਜਾ ਰਿਹਾ ਹੈ। ਉਹਨਾਂ ਕਿਹਾ ਕਿ ਦਲਿਤ ਵਿਧਾਇਕਾਂ ਦੀਆਂ ਸੀਟਾਂ ਹੀ ਅਕਾਲੀ ਦਲ ਵਲੋਂ ਬਦਲੀਆਂ ਗਈਆਂ ਹਨ। ਇਸ ਮੌਕੇ 'ਤੇ ਸ੍ਰੋਮਣੀ ਕਮੇਟੀ ਮੈਂਬਰ ਸਰੂਪ ਸਿੰਘ ਢੇਸੀ, ਹੰਸ ਰਾਜ ਰਾਣਾ, ਅਜੈਬ ਸਿੰਘ, ਕਮਲਜੀਤ ਸਿੰਘ ਘੂੰਮਣ, ਹਰਨੇਕ ਸਿੰਘ ਨੇਕੀ, ਰਾਣਾ ਦੁਸ਼ਾਂਝ, ਸੁਖਪਾਲ ਸਿੰਘ ਰੂਬੀ ਅਤੇ ਆਪ ਦੇ ਵਪਾਰ ਤੇ ਇੰਡਸਟਰੀ ਸੈਲ ਦੇ ਮੀਤ ਪ੍ਰਧਾਨ ਸੁਰਿੰਦਰ ਸਿੰਘ ਵੀ ਕਾਂਗਰਸ 'ਚ ਸ਼ਾਮਲ ਹੋਏ।