ਵਿਧਾਨ ਸਭਾ ਚੋਣਾਂ ---- ਪਹਿਲੀ ਵਾਰ ਦੋ ਮੁੱਖ ਮੰਤਰੀ ਦੇ ਦਾਅਵੇਦਾਰ ਆਹਮਣੇ ਸਾਹਮਣੇ

ਦੋ ਫੌਜੀ ਅਫਸਰ ਵੀ ਆਹਮਣੇ ਸਾਹਮਣੇ ਡਟੇ 
ਡਾਕਟਰ, ਪ੍ਰੋਫੈਸਰ, ਵਕੀਲ ਤੇ ਅਫਸਰ ਸਿਆਸੀ ਪਾਰਟੀਆਂ ਦੀ ਪਹਿਲੀ ਪਸੰਦ 
ਆਪ ਅਤੇ ਅਪਣਾ ਪੰਜਾਬ ਪਾਰਟੀ ਦੇ ਸੱਭ ਤੋਂ ਵੱਧ ਪੇਸ਼ੇਵਰ ਉਮੀਦਵਾਰ  
ਚੰਡੀਗੜ 23 ਜਨਵਰੀ ( ਜੈ ਸਿੰਘ ਛਿੱਬਰ) : 15 ਵੀ ਵਿਧਾਨ ਸਭਾ ਲਈ 4 ਫਰਵਰੀ ਨੂੰ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਕਈ ਇਤਿਹਾਸ ਬਣ ਰਹੇ ਹਨ। ਇਹਨਾਂ ਚੋਣਾਂ 'ਚ ਪਹਿਲੀ ਦੋ ਮੁੱਖ ਮੰਤਰੀ ਦੇ ਦਾਅਵੇਦਾਰਾਂ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਕੈਪਟਨ ਅਮਰਿੰਦਰ ਸਿੰਘ ਦੇ ਵਿਚਕਾਰ ਲੰਬੀ ਵਿਧਾਨ ਸਭਾ ਹਲਕੇ ਤੋਂ ਜੰਗ ਹੋ ਰਹੀ ਹੈ। ਉਥੇ ਕੈਪਟਨ ਅਮਰਿੰਦਰ ਸਿੰਘ ਹੀ ਇੱਕ ਅਜਿਹੇ ਉਮੀਦਵਾਰ ਹਨ, ਜੋ ਦੋ ਵਿਧਾਨ ਸਭਾ ਹਲਕਿਆਂ ਤੋਂ ਚੋਣ ਲੜ ਰਹੇ ਹਨ। ਇਸੀ ਤਰ•ਾਂ ਦੋ ਸਾਬਕਾ ਮੁੱਖ ਮੰਤਰੀ ਆਪਣੀ ਕਿਸਮਤ ਅਜ਼ਮਾ ਰਹੇ ਹਨ ਅਤੇ ਦੋ ਫੌਜੀ ਅਧਿਕਾਰੀ ( ਕੈਪਟਨ ਤੇ ਜੇ.ਜੇ ਸਿੰਘ) ਵੀ ਆਹਮਣੇ ਸਾਹਮਣੇ ਡਟੇ ਹੋਏ ਹਨ। ਇਹ ਵੀ ਪਹਿਲੀ ਵਾਰ ਹੈ ਕਿ 117 ਵਿਧਾਨ ਸਭਾ ਹਲਕਿਆਂ 'ਚ ਉਤਰੇ 1145 ਉਮੀਦਵਾਰਾਂ ਵਿੱਚ ਡਾਕਟਰ, ਵਕੀਲ, ਪ੍ਰੋਫੈਸਰ, ਪ੍ਰਸ਼ਾਸਨਿਕ ਅਧਿਕਾਰੀ (ਆਈ.ਏ.ਐਸ), ਗਾਇਕ ਤੇ ਸਾਬਕਾ ਅਧਿਆਪਕ  ਵੀ ਸਿਆਸਤ ਦੀ ਪੌੜੀ ਰਾਹੀਂ ਵਿਧਾਨ ਸਭਾ 'ਚ ਪੁੱਜਣ ਲਈ ਯਤਨਸ਼ੀਲ ਹਨ। 
ਜੇਕਰ ਸਿਆਸੀ ਪਾਰਟੀਆਂ ਵਲੋਂ ਚੋਣ ਮੈਦਾਨ 'ਚ ਉਤਾਰੇ ਉਮੀਦਵਾਰਾਂ 'ਤੇ ਨਜ਼ਰ ਮਾਰੀ ਜਾਵੇ ਤਾਂ ਸਾਰੀਆਂ ਸਿਆਸੀ ਪਾਰਟੀਆਂ ਨੇ ਸਾਰੇ ਸਮੀਕਰਣਾਂ ਨੂੰ ਧਿਆਨ 'ਚ ਰੱਖਕੇ ਉਮੀਦਵਾਰਾਂ ਦੀ ਚੋਣ ਕੀਤੀ ਹੈ। ਅਕਾਲੀ ਦਲ ਨੇ ਹਾਈਕੋਰਟ ਦੇ ਸਾਬਕਾ ਜਸਟਿਸ ਨਿਰਮਲ ਸਿੰਘ ਨੂੰ ਦੂਸਰੀ ਵਾਰ ਚੋਣ ਮੈਦਾਨ 'ਚ ਉਤਾਰਿਆ ਹੈ।  ਇਸੀ ਤਰ•ਾਂ ਪਟਿਆਲਾ ਤੋਂ ਭਾਰਤੀ ਸੈਨਾ ਦੇ ਸਾਬਕਾ ਮੁਖੀ ਜਨਰਲ ਜੇ.ਜੇ.ਸਿੰਘ 'ਤੇ ਵੀ ਸਿਆਸੀ ਦਾਅ ਖੇਡਿਆ ਹੈ। ਕਾਂਗਰਸ ਨੇ ਚੱਬੇਵਾਲ, ਰਾਏਕੋਟ, ਮੋਗਾ,ਮਾਨਸਾ ਹਲਕੇ ਤੋਂ ਡਾਕਟਰਾਂ ਨੂੰ ਉਮੀਦਵਾਰ ਬਣਾਇਆ ਹੈ। ਇਸੀ ਤਰ•ਾਂ ਜੈਤੋਂ ਤੋਂ ਪੰਜਾਬੀ ਗਾਇਕ ਮੁਹੰਮਦ ਸਦੀਕ ਅਤੇ ਸਾਹਨੇਵਾਲ ਤੋਂ ਲੋਕ ਗਾਇਕਾਂ ਸਤਵਿੰਦਰ ਬਿੱਟੀ ਨੂੰ ਚੋਣ ਮੈਦਾਨ 'ਚ ਉਤਾਰਿਆ ਹੈ। ਪਹਿਲੀ ਵਾਰ ਪੰਜਾਬ ਵਿਧਾਨ ਸਭਾ ਚੋਣਾਂ 'ਚ ਉਤਰੀ ਆਮ ਆਦਮੀ ਪਾਰਟੀ ਅਤੇ ਆਪ ਤੋਂ ਅਲੱਗ ਹੋ ਕੇ ਅਪਣਾ ਪੰਜਾਬ ਪਾਰਟੀ ਬਨਾਉਣ ਵਾਲੇ ਸੁੱਚਾ ਸਿੰਘ ਛੋਟੇਪੁਰ ਵਲੋਂ ਵੱਖ ਵੱਖ ਕਿੱਤਿਆਂ ਨਾਲ ਜੁੜੇ ਲੋਕਾਂ ਨੂੰ ਉਮੀਦਵਾਰ ਬਨਾਉਣ ਨੂੰ ਪਹਿਲ ਦਿੱਤੀ ਹੈ। ਆਮ ਆਦਮੀ ਪਾਰਟੀ ਦੇ 25 ਉਮੀਦਵਾਰ, ਅਪਣਾ ਪੰਜਾਬ ਪਾਰਟੀ ਦੇ ਦਸ ਉਮੀਦਵਾਰ ਵੱਖ ਵੱਖ ਪ੍ਰੋਫੈਸ਼ਨਲ ਨਾਲ ਜੁੜੇ ਹੋਏ ਹਨ। ਤ੍ਰਿਣਮੂਲ ਕਾਂਗਰਸ, ਸਾਂਸਦ ਡਾ ਧਰਮਵੀਰ ਗਾਂਧੀ ਵਲੋਂ ਵੀ ਪੇਸ਼ੇਵਰ ਉਮੀਦਵਾਰਾਂ ਨੂੰ ਤਰਜੀਹ ਦਿੱਤੀ ਗਈ ਹੈ। ਜਦੋਂਕਿ ਅਕਾਲੀ ਦਲ ਤੇ ਕਾਂਗਰਸ ਇਸ ਮਾਮਲੇ 'ਚ ਪਿਛੜੇ ਹੋਏ ਹਨ। ਆਮ ਆਦਮੀ ਪਾਰਟੀ ਨੇ ਮੋਗਾ ਤੋਂ ਐਡਵੋਕੇਟ ਰਮੇਸ਼ ਗਰੋਵਰ, ਤਲਵੰਡੀ ਸਾਬੋ ਤੋਂ ਪ੍ਰੋਫੈਸਰ ਬਲਜਿੰਦਰ ਕੌਰ,ਬੁਢਲਾਡਾ ਤੋਂ ਪ੍ਰਿੰਸੀਪਲ ਬੁੱਧ ਰਾਮ, ਪਟਿਆਲਾ ਤੋਂ ਡਾ ਬਲਵੀਰ ਸਿੰਘ, ਚਮਕੌਰ ਸਾਹਿਬ ਤੋਂ ਡਾ ਚਰਨਜੀਤ ਸਿੰਘ, ਦਾਖਾ ਤੋਂ ਐਡਵੋਕੇਟ ਐਚ.ਐਸ ਫੁਲਕਾ, ਬਾਘਾਪੁਰਾਣਾ ਤੋਂ ਕੈਪਟਨ ਗੁਰਵਿੰਦਰ ਸਿੰਘ ਕੰਗ, ਸ਼੍ਰੀ ਹਰਗੋਬਿੰਦਪੁਰ ਤੋਂ ਐਡਵੋਕੇਟ ਅਮਰਪਾਲ ਸਿੰਘ, ਅੰਮ੍ਰਿਤਸਰ ਸੈਂਟਰਲ ਤੋਂ  ਡਾ ਅਜੈ ਗੁਪਤਾ, ਅੰਮ੍ਰਿਤਸਰ ਦੱਖਣੀ ਤੋਂ ਡਾ ਇੰਦਰਵੀਰ ਸਿੰਘ ਨਿੱਝਰ, ਖੇਮਕਰਨ ਤੋਂ ਕੈਪਟਨ ਬਿਕਰਮਜੀਤ ਸਿੰਘ, ਸ਼ਾਹਕੋਟ ਤੋਂ ਡਾ ਅਮਨਜੀਤ ਸਿੰਘ ਥਿੰਦ, ਜਲੰਧਰ ਸੈਂਟਰਲ ਤੋਂ ਡਾ ਸੰਜੀਵ ਕੁਮਾਰ ਸ਼ਰਮਾਂ, ਸ਼ਾਮ ਚੁਰਾਸੀ ਤੋਂ ਡਾ ਰਣਜੀਤ ਸਿੰਘ, ਬਲਾਚੋਰ ਤੋਂ ਬ੍ਰਿਗੇਡੀਅਰ ਰਾਜ  ਕੁਮਾਰ, ਸ੍ਰੀ ਆਨੰਦਪੁਰ ਸਾਹਿਬ ਹਲਕੇ ਤੋਂ ਡਾ ਸੰਜੀਵ ਗੌਤਮ ਉਮੀਦਵਾਰ ਹਨ। 
ਇਸੀ ਤਰ•ਾਂ ਅਪਣਾ ਪੰਜਾਬ ਪਾਰਟੀ ਵਲੋਂ ਕਾਦੀਆਂ ਤੋਂ ਸੁਬੇਦਾਰ ਕੁਲਵੰਤ ਸਿੰਘ, ਸ੍ਰੀ ਹਰਗੋਬਿੰਦਪੁਰ ਤੋਂ ਪ੍ਰਿੰਸੀਪਲ ਓਮ ਪ੍ਰਕਾਸ਼, ਜਲੰਧਰ ਪੱਛਮੀ ਤੋਂ ਡਾ ਜੁਗਲ ਕਿਸ਼ੋਰ, ਉੜਮੁੜ ਤੋਂ ਕਰਨਲ ਵਰਿੰਦਰ ਸ਼ਰਮਾ, ਸ਼ਾਮ ਚੁਰਾਸੀ ਤੋਂ ਡਾ ਸਤੀਸ਼ ਲਾਂਬਾ, 
ਪਾਇਲ ਤੋਂ ਕੈਪਟਨ ਰਾਮਪਾਲ ਸਿੰਘ, ਜਲਾਲਾਬਾਦ ਤੋਂ ਐਡਵੋਕੇਟ ਬਖਸ਼ੀਸ਼  ਸਿੰਘ, ਤਲਵੰਡੀ ਸਾਬੋ ਤੋਂ ਐਡਵੋਕੇਟ ਵਰਿੰਦਰ ਢਿਲੋਂ, ਕੋਟਕਪੁਰਾ ਤੋਂ ਡਾ ਸੁਰਿੰਦਰ ਕੁਮਾਰ ਦ੍ਰਿਵੇਦੀ ਅਤੇ ਜੈਤੋ ਤੋਂ ਡਾ ਹਰਪਾਲ ਸਿੰÎਘ ਗਿੱਲ 'ਤੇ ਕਿਸਮਤ ਅਜਮਾਈ ਜਾ ਰਹੀ ਹੈ। 
ਬਹੁਜਨ ਸਮਾਜ ਪਾਰਟੀ ਵਲੋਂ ਮਹਿਲਕਲ•ਾਂ ਤੋਂ ਡਾ ਮੱਖਣ ਸਿੰਘ, ਤਰਨ ਤਾਰਨ ਤੋਂ ਸੇਵਾ ਮੁਕਤ ਡੀ.ਆਈ.ਜੀ ਅਨੰਤਜੀਤ ਸਿੰਘ, ਮੋਹਾਲੀ ਤੋਂ ਪ੍ਰਿੰਸੀਪਲ ਸਰਬਜੀਤ ਸਿੰਘ ਨੂੰ ਉਮੀਦਵਾਰ ਬਣਾਇਆ ਹੈ। ਜਦੋਂਕਿ ਪਹਿਲੀ ਵਾਰ ਚੋਣ ਲੜ ਰਹੀ ਤ੍ਰਿਣਮੂਲ ਕਾਂਗਰਸ ਵਲੋਂ ਸ੍ਰੀ ਫਤਿਹਗੜ ਸਾਹਿਬ ਤੋਂ ਡਾ ਹਰਬੰਸ ਲਾਲ, ਬਾਘਾ ਪੁਰਾਣਾ ਤੋਂ ਪ੍ਰੋਫੈਸਰ ਮਨਪ੍ਰੀਤ ਕੌਰ ਬਰਾੜ, ਜੈਤੋ ਤੋਂ ਪ੍ਰੋਫੈਸਰ ਅਵਤਾਰ ਸਿੰਘ ਸਹੋਤਾ ਨੂੰ ਉਮੀਦਵਾਰ ਹਨ। ਇਸੀ ਤਰ•ਾਂ ਪੰਜਾਬ ਫਰੰਟ ਵਲੋਂ ਅੰਮ੍ਰਿਤਸਰ ਸਾਉਥ ਤੋਂ ਪ੍ਰਿੰਸੀਪਲ ਸੂਬਾ ਸਿੰਘ, ਲੁਧਿਆਣਾ ਪੱਛਮੀ ਤੋਂ ਪ੍ਰੋਫੈਸਰ ਸੰਤੋਸ਼ ਸਿੰਘ, ਪਟਿਆਲਾ ਤੋਂ ਪ੍ਰੋਫੈਸਰ ਮੋਹਨਜੀਤ ਕੌਰ ਟੀਵਾਣਾ, ਪਾਇਲ ਤੋਂ ਐਡਵੋਕੇਟ ਇੰਦਰਜੀਤ ਸਿੰਘ ਉਮੀਦਵਾਰ ਹਨ। 

ਔਰਤਾਂ ਨੂੰ ਸਿਆਸਤ 'ਚ ਭਾਗੀਦਾਰ ਬਨਾਉਣ ਦਾ ਦਾਅਵੇ ਖੋਖਲੇ

ਜ਼ਿਆਦਤਰ ਰਾਖਵੇਂ ਹਲਕਿਆਂ 'ਚ ਮਹਿਲਾ ਉਮੀਦਵਾਰਾਂ ਨੂੰ ਟਿਕਟ
ਕਾਂਗਰਸ ਨੇ 10, ਆਪ 9, ਅਕਾਲੀ ਦਲ 5, ਭਾਜਪਾ ਨੇ 2 ਮਹਿਲਾ ਉਮੀਦਵਾਰਾਂ ਨੂੰ ਦਿੱਤੀ ਟਿਕਟ
ਚੰਡੀਗੜ 18 ਜਨਵਰੀ ( ਜੈ ਸਿੰਘ ਛਿੱਬਰ) : ਸਿਆਸੀ ਆਗੂਆਂ ਵਲੋਂ ਔਰਤਾਂ ਨੂੰ ਬਰਾਬਰਤਾ ਦੇ ਅਧਿਕਾਰ ਦੇਣ ਅਤੇ ਸੱਤਾਂ 'ਚ ਭਾਗੀਦਾਰ ਬਨਾਉਣ ਲਈ ਵੱਡੇ ਦਾਅਵੇ ਤੇ ਬਿਆਨਬਾਜ਼ੀ ਕੀਤੀ  ਜਾਂਦੀ ਹੈ, ਪਰ ਤਾਜ਼ਾ ਹੋ ਰਹੀਆਂ ਵਿਧਾਨ ਸਭਾ ਚੋਣਾਂ ਦੇ ਅੰਕੜੇ ਦੱਸਦੇ ਹਨ ਰਾਜਨੀਤਿਕ ਪਾਰਟੀਆਂ ਨੂੰ ਆਪਣੀਆਂ ਮਹਿਲਾ ਉਮੀਦਵਾਰਾਂ 'ਤੇ ਭਰੋਸਾ ਨਹੀਂ ਹੈ। ਕਾਂਗਰਸ ਨੇ 10 ਅਤੇ ਆਮ ਆਦਮੀ ਪਾਰਟੀ ਨੇ 9 ਮਹਿਲਾ ਉਮੀਦਵਾਰਾਂ ਨੂੰ ਟਿਕਟ ਦਿੱਤੀ ਹੈ, ਜਦੋਂਕਿ ਬਾਕੀ ਪਾਰਟੀਆਂ ਵਲੋਂ ਔਰਤਾਂ ਨੂੰ ਉਮੀਦਵਾਰ  ਬਨਾਉਣ ਲਈ ਰੱਜਕੇ ਕੰਜੂਸੀ ਦਿਖਾਈ ਹੈ। ਸੱਭ ਤੋਂ ਮਹੱਤਵਪੂਰਨ ਗੱਲ ਹੈ ਕਿ ਜ਼ਿਆਦਾਤਰ ਔਰਤਾਂ ਰਾਖਵਾਂ ਸੀਟਾਂ 'ਤੇ ਚੋਣ ਮੈਦਾਨ 'ਚ ਹਨ। ਇਸ ਤਰ•ਾਂ ਵੀ ਸਿਆਸੀ ਪਾਰਟੀਆਂ ਨੇ ਰਾਖਵੀਆਂ ਸੀਟਾਂ 'ਤੇ ਇਕ ਤਰ•ਾਂ ਨਾਲ ਖਾਨਾਪੂਰਤੀ ਹੀ ਕੀਤੀ ਹੈ।
ਕਾਂਗਰਸ ਹੀ ਇਕੱਲੀ ਅਜਿਹੀ ਪਾਰਟੀ ਹੈ ਜੋ ਆਪਣੇ ਦਮ 'ਤੇ 117  ਸੀਟਾਂ 'ਤੇ ਚੋਣ ਲੜ ਰਹੀ ਹੈ। ਦੂਜੇ ਨੰਬਰ 'ਤੇ ਆਮ ਆਦਮੀ ਪਾਰਟੀ ਹੈ ਜੋ ਕਿ 112 ਸੀਟਾਂ 'ਤੇ ਆਪਣੇ ਉਮੀਦਵਾਰ ਖੜੇ ਕੀਤੇ ਹਨ। ਕਾਂਗਰਸ ਵਲੋਂ ਜਿਹੜੀਆਂ ਦਸ ਸੀਟਾਂ 'ਤੇ ਆਪਣੇ ਮਹਿਲਾ ਆਗੂਆਂ 'ਤੇ ਭਰੋਸਾ ਕੀਤਾ ਹੈ, ਉਹਨਾਂ ਵਿੱਚ ਪੰਜ ਮੌਜੂਦ ਵਿਧਾਇਕਾਂ ਨੂੰ ਹੀ ਦੁਬਾਰਾ ਟਿਕਟ ਦਿੱਤੀ ਗਈ ਹੈ ਜਦੋਂ ਕਿ ਇੱਕ ਸਾਬਕਾ ਵਿਧਾਇਕ ਹੈ। ਪਾਰਟੀ ਵਲੋਂ ਦੀਨਾਨਗਰ ਤੋਂ ਵਿਧਾਇਕ ਅਰੁਣ ਚੌਧਰੀ, ਫਿਰੋਜਪੁਰ ਦਿਹਾਤੀ (ਰਾਖਵਾਂ) ਤੋਂ ਸਤਕਾਰ ਕੌਰ, ਮੁਕਤਸਰ ਤੋਂ ਵਿਧਾਇਕ ਕਰਨ ਬਰਾੜ, ਲਹਿਰਾ ਤੋਂ ਵਿਧਾਇਕ ਰਾਜਿੰਦਰ ਕੌਰ ਭੱਠਲ, ਮਹਿਲਾ ਕਲ•ਾਂ (ਰਾਖਵਾਂ)ਤੋਂ ਵਿਧਾਇਕ ਹਰਚੰਦ ਕੌਰ, ਨਿਹਾਲ ਸਿੰਘ ਵਾਲਾ (ਰਾਖਵਾਂ)ਤੋਂ ਵਿਧਾਇਕ ਰਜਿੰਦਰ ਕੌਰ ਭਾਗੀਕੇ,  ਮਲੇਰਕੋਟਲਾ ਤੋਂ ਰਜੀਆ ਸੁਲਤਾਨਾ, ਸੁਨਾਮ ਤੋਂ ਦਮਨ ਬਾਜਵਾ, ਮਾਨਸਾ ਅੰਜੂ ਬੰਸਲ, ਬੁਢਲਾਡਾ (ਰਾਖਵਾਂ) ਤੋਂ ਰਣਜੀਤ ਕੌਰ ਭੱਟੀ ਨੂੰ ਉਮੀਦਵਾਰ ਬਣਾਇਆ ਹੈ। ਅਕਾਲੀ ਦਲ ਦੀ ਸਹਿਯੋਗੀ ਪਾਰਟੀ ਜੋਂ 23 ਸੀਟਾਂ 'ਤੇ ਚੋਣ ਲੜ ਰਹੀ ਹੈ, ਨੇ ਆਪਣੀਆਂ ਦੋ ਵਿਧਾਇਕਾਂ ਭੋਹਾ (ਰਾਖਵਾਂ) ਤੋਂ ਸੀਮਾ ਕੁਮਾਰੀ ਅਤੇ ਦਸੂਹਾ ਤੋਂ ਵਿਧਾਇਕ ਸੁਖਜੀਤ  ਕੌਰ ਸ਼ਾਹੀ ਨੂੰ ਚੋਣ ਮੈਦਾਨ 'ਚ ਉਤਾਰਿਆ ਹੈ।
ਅਕਾਲੀ ਦਲ ਨੇ 94 ਸੀਟਾਂ ਵਿਚੋਂ 5 ਸੀਟਾਂ 'ਤੇ ਮਹਿਲਾ ਉਮੀਦਵਾਰ ਖ਼ੜੇ ਕੀਤੇ ਹਨ। ਜਿਹਨਾਂ ਵਿੱਚ ਸੁਲਤਾਨਪੁਰ ਲੋਧੀ ਤੋਂ ਉਪਿੰਦਰਜੀਤ ਕੌਰ, ਸ਼ਾਮਚੁਰਾਸੀ (ਰਾਖਵਾਂ) ਮਹਿੰਦਰ ਕੌਰ ਜੋਸ਼, ਜਗਰਾਓ (ਰਾਖਵਾਂ) ਤੋਂ ਅਮਰਜੀਤ ਕੌਰ, ਘਨੌਰ ਤੋਂ ਹਰਪ੍ਰੀਤ ਕੌਰ ਮੁਖਮੈਲਪੁਰ ਅਤੇ ਸ਼ੁਤਰਾਣਾ (ਰਾਖਵਾਂ) ਤੋਂ ਵਰਿੰਦਰ ਕੌਰ ਲੂੰਬਾ ਸ਼ਾਮਲ ਹਨ।
ਆਮ ਆਦਮੀ ਪਾਰਟੀ ਵਲੋਂ ਪਹਿਲੀ ਵਾਰ 112 ਸੀਟਾਂ 'ਤੇ ਚੋਣਾਂ ਲੜੀਆਂ ਜਾ ਰਹੀਆਂ ਹਨ ਅਤੇ 9 ਮਹਿਲਾ ਉਮੀਦਵਾਰਾਂ ਨੂੰ ਚੋਣ ਜੰਗ 'ਚ ਭੇਜਿਆ ਹੈ। ਆਪ ਨੇ ਦਸੂਹਾ ਹਲਕੇ ਤੋਂ ਬਲਵੀਰ ਕੌਰ ਫੁੱਲ, ਬੰਗਾ (ਰਾਖਵਾਂ) ਤੋਂ ਹਰਜੋਤ ਕੌਰ, ਜਗਰਾਓ (ਰਾਖਵਾਂ) ਤੋਂ ਸਰਬਜੀਤ ਕੌਰ ਮਾਣੂਕੇ, ਬਠਿੰਡਾ ਰੂਰਲ(ਰਾਖਵਾਂ) ਤੋਂ ਰੁਪਿੰਦਰ ਕੌਰ, ਤਲਵੰਡੀ ਸਾਬੋ ਤੋਂ ਪ੍ਰੋਫੈਸਰ ਬਲਜਿੰਦਰ ਕੌਰ, ਡੇਰਾਬਸੀ ਤੋਂ ਸਰਬਜੀਤ ਕੌਰ, ਸਨੌਰ ਤੋਂ ਕੁਲਦੀਪ ਕੌਰ ਟੋਹੜਾ, ਘਨੋਰ ਤੋਂ ਮਨੂੰ ਰੰਧਾਵਾ, ਸ਼ਤਰਾਣਾ (ਰਾਖਵਾਂ) ਤੋਂ ਪਲਵਿੰਦਰ ਕੌਰ ਦਾ ਨਾਮ ਸ਼ਾਮਲ ਹੈ। ਇਸੀ ਤਰ•ਾਂ ਬਹੁਜਨ ਸਮਾਜ ਪਾਰਟੀ ਵਲੋਂ ਗਿੱਦੜਬਾਹਾ ਤੋਂ ਸ਼ੀਲਾ ਰਾਣੀ ਤੇ ਅਟਾਰੀ (ਰਾਖਵਾਂ) ਤੋਂ ਸੁਖਵੰਤਜੀਤ ਕੌਰ ਨੂੰ ਉਮੀਦਵਾਰ ਬਣਾਇਆ ਹੈ। ਪਹਿਲੀ ਵਾਰ ਪੰਜਾਬ 'ਚ ਚੋਣਾਂ ਲੜ ਰਹੀ ਤ੍ਰਿਣਮੂਲ ਕਾਂਗਰਸ (ਟੀ.ਐਮ.ਸੀ) ਵਲੋਂ 20 ਸੀਟਾਂ ਵਿਚੋਂ ਦੋ ਹਲਕਿਆਂ ਮਲੇਰਕੋਟਲਾ ਤੋਂ ਬੇਗਮ ਪਰਵੀਨ ਨੁਸਰਤ ਅਤੇ ਬਾਘਾ ਪੁਰਾਣਾ ਤੋਂ ਮਨਪ੍ਰੀਤ ਕੌਰ ਬਰਾੜ ਨੂੰ ਟਿਕਟ ਦਿੱਤੀ ਗਈ ਹੈ। ਸੀ ਪੀ.ਆਈ ਨੇ 9 ਉਮੀਦਵਾਰਾਂ ਵਿਚੋਂ ਕੇਵਲ ਇੱਕ ਹਰਗੋਬਿੰਦਪੁਰ ਹਲਕੇ ਤੋਂ ਲਖਵਿੰਦਰ ਕੌਰ ਨੂੰ ਟਿਕਟ ਦਿੱਤੀ ਹੈ। ਪੰਜਾਬ ਫਰੰਟ ਵਲੋਂ ਪਟਿਆਲਾ ਤੋਂ ਮੋਹਨਜੀਤ ਕੌਰ ਟੀਵਾਣਾ ਉਮੀਦਵਾਰ ਹਨ। ਇਸੀ ਤਰ•ਾਂ ਸੁੱਚਾ ਸਿੰਘ ਛੋਟੇਪੁਰ ਦੀ ਅਗਵਾਈ ਵਾਲੀ ਅਪਣਾ ਪੰਜਾਬ ਪਾਰਟੀ (ਆਪ) ਵਲੋਂ 85 ਉਮੀਦਵਾਰਾਂ 'ਚੋ 4 ਮਹਿਲਾ ਉਮੀਦਵਾਰਾਂ 'ਤੇ ਹੀ ਭਰੋਸਾ ਕੀਤਾ ਗਿਆ ਹੈ। ਜਿਹਨਾਂ 'ਚ ਭੋਹਾ (ਰਾਖਵਾਂ) ਤੋ ਅਨਿਕਾ ਰਾਏ, ਚਮਕੌਰ ਸਾਹਿਬ (ਰਾਖਵਾਂ) ਤੋਂ ਪਰਮਿੰਦਰ ਕੌਰ ਰੰਗੜਾ, ਸੰਗਰੂਰ ਤੋਂ ਪਰਮਿੰਦਰ ਕੌਰ ਤੇ ਪਟਿਆਲਾ ਰੂਰਲ ਤੋਂ ਸ਼ਮਿੰਦਰ ਕੌਰ ਹਨ।
ਚਾਰ ਵਿਧਾਇਕਾਂ ਚੋਣ ਮੈਦਾਨ 'ਚੋ ਬਾਹਰ---
ਕਾਦੀਆਂ ਤੋਂ ਕਾਂਗਰਸੀ ਵਿਧਾਇਕ ਚਰਨਜੀਤ ਕੌਰ ਬਾਜਵਾ ਨੇ ਆਪਣੇ ਦਿਓਰ ਫਤਿਹਜੰਗ ਬਾਜਵਾ, ਅੰਮ੍ਰਿਤਸਰ ਤੋਂ ਨਵਜੋਤ ਕੌਰ ਸਿੱਧੂ ਨੇ ਅਪਣੇ ਪਤੀ ਨਵਜੋਤ ਸਿੱਧੂ, ਨਵਾਸ਼ਹਰ ਤੋਂ ਵਿਧਾਇਕ ਗੁਰਕੰਵਲ ਕੌਰ ਨੇ ਆਪਣੇ ਬੇਟੇ ਅੰਗਦ ਸੈਣੀ ਤੇ ਭੁਲੱਥ ਤੋਂ ਵਿਧਾਇਕ ਬੀਬੀ ਜਗੀਰ ਕੌਰ ਨੇ ਆਪਣੇ ਜਵਾਈ ਯੁਵਰਾਜ ਭੁਪਿੰਦਰ ਸਿੰਘ ਲਈ ਦਾਅਵੇਦਾਰੀ ਛੱਡੀ ਹੈ। 

ਦਲਿਤ ਵੋਟ ਬੈਂਕ --- ਕਾਂਗਰਸ, ਅਕਾਲੀ ਦਲ ਨੇ ਚੋਣ ਮੈਦਾਨ 'ਚ ਉਤਾਰੇ ਦਲਿਤ ਸਾਬਕਾ ਆਈ.ਏ.ਐਸ ਅਧਿਕਾਰੀ

ਚੰਡੀਗੜ14 ਜਨਵਰੀ ( ਜੈ ਸਿੰਘ ਛਿੱਬਰ) : ਪੰਜਾਬ ਵਿਧਾਨ ਸਭਾ ਦੀਆਂ ਕੁੱਲ 117 ਸੀਟਾਂ ਵਿਚੋਂ 34 ਰਾਖਵੇ ਹਲਕੇ ਹੋਣ ਅਤੇ ਸੱਭ ਤੋਂ ਵੱਧ 34 ਫ਼ੀ ਸਦੀ ਦੇ ਕਰੀਬ ਦਲਿਤਾਂ ਦੀ ਅਬਾਦੀ ਹੋਣ  ਕਾਰਨ ਸਾਰੀਆਂ ਸਿਆਸੀ ਪਾਰਟੀਆਂ ਦੀਆਂ ਨਜ਼ਰਾਂ ਦਲਿਤ ਵੋਟਰਾਂ ਤੇ ਟਿਕੀਆਂ ਹੋਈਆਂ ਹੋਈਆਂ ਹਨ। ਵੱਡੇ ਵੋਟ ਬੈਂਕ ਨੂੰ ਨਾਲ ਜੋੜਨ ਲਈ ਰਾਜਨੀਤਿਕ ਪਾਰਟੀਆਂ ਵਲੋਂ ਦਲਿਤ ਵਰਗ ਲਈ ਸਹੂਲਤਾਂ ਤੇ ਵਾਅਦਿਆਂ ਦੀ ਝੜੀ ਵੀ ਲਾਈ ਜਾ ਰਹੀ ਹੈ। ਪਰ ਸਮੇਂ ਦੇ ਹਾਣੀ ਉਮੀਦਵਾਰਾਂ ਦੀ ਘਾਟ ਨੂੰ ਪੂਰਾ ਕਰਨ ਲਈ ਸਿਆਸੀ ਪਾਰਟੀਆਂ ਵਲੋਂ ਭਾਰਤੀ ਪ੍ਰਸ਼ਾਸਨਿਕ ਸਰਵਿਸ (ਆਈ.ਏ.ਐਸ), ਭਾਰਤੀ ਪੁਲਿਸ ਸਰਵਿਸ (ਆਈ.ਪੀ.ਐਸ) ਸਮੇਤ ਹੋਰ ਵੱਡੀਆਂ ਪੋਸਟਾਂ 'ਤੇ ਤੈਨਾਤ ਉਚ ਅਧਿਕਾਰੀਆਂ ਨੂੰ ਬਾਬੂਸ਼ਾਹੀ ਤੋਂ ਰਾਜਸੀ ਆਗੂ ਬਣਾਇਆ ਜਾ ਰਿਹਾ ਹੈ। ਕਾਂਗਰਸ, ਅਕਾਲੀ ਦਲ ਤੇ ਭਾਜਪਾ ਸਮੇਤ ਹੋਰਨਾਂ ਪਾਰਟੀਆਂ ਦੇ ਉਮੀਦਵਾਰਾਂ 'ਤੇ ਨਜ਼ਰ ਮਾਰੀ ਜਾਵੇ ਤਾਂ ਸਾਰੀਆਂ ਪਾਰਟੀਆਂ ਵਲੋਂ ਸੇਵਾ ਮੁਕਤ ਜਾਂ ਫਿਰ ਸਮੇਂ ਤੋਂ ਪਹਿਲਾਂ ਸੇਵਾ ਇੱਛਾ ਸੇਵਾਮੁਕਤੀ ਕਰਵਾਕੇ ਆਈ.ਏ.ਐਸ ਤੇ ਪੀ.ਸੀ.ਐਸ. ਤੇ ਪੀ.ਪੀ.ਐਸ ਅਧਿਕਾਰੀਆਂ ਨੂੰ  ਸਿਆਸੀ ਮੈਦਾਨ 'ਚ ਉਤਾਰਿਆ ਗਿਆ ਹੈ। 
ਅਕਾਲੀ ਦਲ ਨੇ ਮੁੱਖ ਮੰਤਰੀ ਪਰਕਾਸ਼ ਸਿੰਘ ਬਾਦਲ ਦੇ ਪ੍ਰਮੁੱਖ ਸਕੱਤਰ ਰਹੇ ਦਰਬਾਰਾ ਸਿੰਘ ਗੁਰੂ ਨੂੰ ਸਾਲ 2012 ਦੀਆਂ ਚੋਣਾਂ 'ਚ ਮੈਦਾਨ ਵਿੱਚ ਉਤਾਰਿਆ ਸੀ, ਪਰ ਉਹ ਲੋਕ ਗਾਇਕ ਮਹੁੰਮਦ ਸਦੀਕ ਤੋਂ ਮਾਤ ਖਾ ਗਏ ਸਨ। ਇਸ ਵਾਰ ਫਿਰ ਅਕਾਲੀ ਦਲ ਨੇ ਉਹਨਾਂ ਤੇ ਭਰੋਸਾ ਕਰਦਿਆਂ ਬਸੀ ਪਠਾਣਾ ਵਿਧਾਨ ਸਭਾ ਹਲਕੇ ਤੋਂ ਉਮੀਦਵਾਰ ਬਣਾਇਆ ਹੈ। ਇਸੀ ਤਰ•ਾਂ ਐਸ.ਆਰ.ਕਲੇਰ (ਆਈ.ਏ.ਐਸ) ਨੂੰ ਪਹਿਲੀ ਵਾਰ ਜਗਰਾਓ ਤੋਂ ਉਮੀਦਵਾਰ ਬਣਾਇਆ ਗਿਆ ਸੀ ਤੋਂ ਉਹ ਵਿਧਾਇਕ ਵੀ ਬਣ ਗਏ ਸਨ। ਇਸ ਵਾਰ ਸ਼੍ਰੀ ਕਲੇਰ ਨੂੰ ਨਿਹਾਲ ਸਿੰਘ ਵਾਲਾ ਤੋਂ ਦੂਸਰੀ ਵਾਰ ਕਿਸਮਤ ਅਜਮਾ ਰਹੇ ਹਨ। ਇਸੀ ਤਰ•ਾਂ ਸੋਮ ਪ੍ਰਕਾਸ਼ ਨੇ ਪਹਿਲੀ ਵਾਰ ਭਾਜਪਾ ਦੀ ਟਿਕਟ ਤੋਂ ਹੁਸ਼ਿਆਰਪੁਰ ਲੋਕ ਸਭਾ ਹਲਕੇ ਤੋਂ ਚੋਣ ਲੜੀ ਪਰ ਕਿਸਮਤ ਨੇ ਸਾਥ ਨਹੀਂ ਦਿੱਤਾ। ਫਿਰ 2012 ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਭਾਜਪਾ ਨੇ ਫਗਵਾੜਾ ਤੋਂ ਉਮੀਦਵਾਰ ਬਣਾਇਆ ਤੋਂ ਉਹ ਵਿਧਾਨ ਸਭਾ 'ਚ ਪੁੱਜਣ ਵਿੱਚ ਕਾਮਯਾਬ ਰਹੇ। ਹੁਣ ਫਿਰ ਉਹ ਟਿਕਟ ਲਈ ਲਾਈਨ ਵਿੱਚ ਲੱਗੇ ਹੋਏ ਹਨ। ਇਸੀ ਤਰ•ਾਂ ਕਾਂਗਰਸ ਵਲੋਂ ਮੱਧ ਪ੍ਰਦੇਸ਼ ਦੇ ਸਕੱਤਰ ਅਹੁੱਦੇ ਤੋਂ ਸੇਵਾਮੁਕਤ ਹੋਏ ਡਾ ਅਮਰ ਸਿੰਘ ਨੂੰ ਰਾਏਕੋਟ ਤੋਂ ਚੋਣ ਮੈਦਾਨ ਵਿੱਚ ਉਤਾਰਿਆ ਹੈ। ਮੋਗਾ ਦੇ ਡਿਪਟੀ  ਕਮਿਸ਼ਨਰ ਰਹੇ ਕੁਲਦੀਪ ਸਿੰਘ ਵੈਦ ਦਾ ਵੀ ਸਿਆਸਤ ਮੋਹ ਜਾਗਿਆ ਤੋਂ ਉਹ ਸੇਵਾਇਛਕ ਸੇਵਾਮੁਕਤੀ ਲੈ ਕੇ ਕਾਂਗਰਸ ਦੀ ਗਿੱਲ ਹਲਕੇ ਤੋਂ ਟਿਕਟ ਲੈਣ ਵਿੱਚ ਕਾਮਯਾਬ ਹੋ ਗਏ। ਇਸੀ ਤਰ•ਾਂ ਪੀ.ਸੀ.ਐਸ ਅਧਿਕਾਰੀ ਅਜੈਬ ਸਿੰਘ ਭੱਟੀ 'ਤੇ ਕਾਂਗਰਸ ਨੇ ਦੂਜੀ ਵਾਰ ਭਰੋਸਾ ਪ੍ਰਗਟ ਕਰਦਿਆਂ ਮਲੋਟ ਹਲਕੇ ਤੋਂ ਚੋਣ ਮੈਦਾਨ ਵਿੱਚ ਭੇਜਿਆ ਹੈ। ਇਸੀ ਤਰ•ਾਂ ਕਰਈ ਜਿਲਿ•ਆਂ ਵਿੱਚ ਡਿਪਟੀ ਕਮਿਸ਼ਨਰ ਦੇ ਅਹੁੱਦੇ 'ਤੇ ਰਹਿ  ਚੁੱਕੇ ਤਰਸੇਮ ਸਿੰਘ ਨੂੰ ਵੀ ਕਾਂਗਰਸ ਨੇ ਅਟਾਰੀ ਹਲਕੇ ਤੋਂ ਚੋਣ ਜੰਗ 'ਚ ਭੇਜਿਆ ਹੈ। 
ਅਕਾਲੀ ਦਲ ਨੇ ਸਾਬਕਾ ਜਸਟਿਸ ਨਿਰਮਲ ਸਿੰਘ ਨੂੰ ਪਿਛਲੀ ਵਾਰ ਬਸੀ ਪਠਾਣਾ ਤੋਂ ਚੋਣ ਮੈਦਾਨ ਵਿੱਚ ਉਤਾਰਕੇ ਜਿੱਤ ਦਿਲਾਈ ਇਸ ਵਾਰ ਜਸਟਿਸ ਸ੍ਰੀ ਚਮਕੌਰ ਸਾਹਿਬ ਹਲਕੇ 'ਚ ਕਿਸਮਤ ਅਜਮਾਉਣ ਉਤਰੇ ਹਨ। ਅਕਾਲੀ ਦਲ ਨੇ ਪੁਲਿਸ ਅਧਿਕਾਰੀ ਸਨਮੀਤ ਕੌਰ ਦੇ ਪਤੀ ਅਮਿਤ ਰਤਨ ਨੂੰ ਬਠਿੰਡਾ ਦਿਹਾਤੀ ਹਲਕੇ ਤੋਂ ਉਮੀਦਵਾਰ ਬਣਾਇਆ ਹੈ। 
ਇਸ ਬਾਰੇ ਪੰਜਾਬ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਐਮੂਨਲ ਨਾਹਰ ਜੋ ਕਿ ਦਲਿਤ ਮੁੱਦਿਆਂ 'ਤੇ ਡੂੰਘੀ ਨਜਰ ਰੱਖਦੇ ਹਨ , ਦਾ ਕਹਿਣਾ ਹੈ ਕਿ ਬੇਸ਼ੱਕ ਭਾਰਦ ਦੇ ਦੂਸਰੇ ਰਾਜਾਂ ਦੇ ਮੁਕਾਬਲੇ 'ਚ ਪੰਜਾਬ 'ਚ ਜਾਤੀ ਭੇਦਭਾਵ ਬਹੁਤ ਘੱਟ ਹੈ।  ਭਾਵੇਂ ਦਲਿਤ ਉਚੇ ਅਹੁੱਦਿਆਂ 'ਤੇ ਬਿਰਾਜਮਾਨ ਹੋ ਜਾਣ ਫਿਰ ਵੀ ਲੋਕ ਮਨਾਂ 'ਚ ਦਲਿਤ ਬਾਰੇ ਖਾਸਕਰਕੇ ਅਫਸਰਸਾਹੀ ਤੇ ਬਾਬੂਆਂ ਵਲੋਂ ਭੇਦਭਾਵ ਦੀਆਂ ਕਨਸੋਆ ਦੱਬੀ ਆਵਾਜ਼ 'ਚ ਸਾਹਮਣੇ ਆਉਂਦੀਆਂ ਹਨ। ਜਦੋਂ ਕਿ ਸਿਆਸੀ ਪੰਡਤਾਂ ਦਾ ਮੰਨਣਾ ਹੈ ਕਿ ਅੱਜਕੱਲ ਚੋਣ ਲੜਨਾ ਕਿਸੇ ਦੇ ਵੱਸ ਦੀ ਗੱਲ ਨਹੀਂ ਰਹੀ। ਇਸੀ ਕਰਕੇ ਸਿਆਸੀ ਪਾਰਟੀਆਂ ਵਲੋਂ ਵੱਡੇ ਸਰਮਾਏਦਾਰਾਂ ਜਾਂ ਚੋਣ ਲੜਨ ਦੀ ਗੁਜਾਇੰਸ਼ ਰੱਖਣ ਵਾਲੇ ਨੂੰ ਚੋਣ ਦੰਗਲ ਵਿੱਚ ਉਤਾਰਿਆ ਜਾਂਦਾ ਹੈ। 

ਨਗਰ ਕੌਂਸਲ ਮੋਰਿੰਡਾ ਦੇ ਕਾਰਜ ਸਾਧਕ ਅਫਸਰ ਨੂੰ ਦੋ ਹਜ਼ਾਰ ਰੁਪਏ ਜੁਰਮਾਨਾ

ਮਾਮਲਾ ਸਰਕਾਰੀ ਫਾਈਲਾਂ ਚ ਉਸਾਰੇ ਕਮਿਉਨਿਟੀ ਸੈਂਟਰ ਦਾ
ਮੋਰਿੰਡਾ 7 ਜਨਵਰੀ -  ਸੂਚਨਾ ਕਮਿਸ਼ਨਰ ਪੰਜਾਬ, ਯਸ਼ਵੀਰ ਮਹਾਜਨ ਦੀ ਅਦਾਲਤ ਨੇ ਸੂਚਨਾ ਅਧਿਕਾਰ ਐਕਟ ਤਹਿਤ ਪ੍ਰਾਰਥੀ ਨੂੰ ਸਮੇਂ ਸਿਰ ਸਹੀ ਸੂਚਨਾ ਮੁਹੱਈਆ ਨਾ ਕਰਵਾਉਣ ਦੇ ਦੋਸ਼ ਤਹਿਤ ਸੁਚਨਾ ਅਧਿਕਾਰੀ ਕਮ ਕਾਰਜ ਸਾਧਕ ਅਫਸਰ ਨਗਰ ਕੌਂਸਲ ਮੋਰਿੰਡਾ (ਰੂਪਨਗਰ) ਰਜਨੀਸ਼ ਸੂਦ ਨੂੰ ਦੋ ਹਜ਼ਾਰ ਰੁਪਏ ਜੁਰਮਾਨਾ ਕੀਤਾ ਹੈ। ਅਦਾਲਤ ਨੇ ਸੂਚਨਾ ਅਧਿਕਾਰੀ ਨੂੰ ਪ੍ਰਾਰਥੀ ਨੂੰ ਮੁਆਵਜੇ ਦੇ ਰੂਪ ਵਿੱਚ 1500 ਰੁਪਏ ਦੀ ਅਦਾਇਗੀ ਕਰਨ ਦੇ ਵੀ ਆਦੇਸ਼ ਦਿੱਤੇ ਹਨ। 
ਜਾਣਕਾਰੀ ਅਨੁਸਾਰ ਮੋਰਿੰਡਾ ਨਿਵਾਸੀ ਆਰ.ਟੀ,ਆਈ ਕਾਰਕੁੰਨ ਜੈ ਸਿੰਘ ਛਿੱਬਰ ਨੇ ਸੂਚਨਾ ਅਧਿਕਾਰੀ ਕਮ ਕਾਰਜ ਸਾਧਕ ਅਫਸਰ ਨਗਰ ਕੌਂਸਲ ਮੋਰਿੰਡਾ ਤੋਂ ਨਗਰ ਕੌਂਸਲ ਮੋਰਿੰਡਾ ਵਲੋਂ ਬਣਾਏ ਗਏ ਕਮਿਉਨਿਟੀ ਸੈਂਟਰ ਸਮੇਤ ਹੋਰ ਥਾਵਾਂ 'ਤੇ ਮੁੱਖ ਮੰਤਰੀ ਪੰਜਾਬ ਅਤੇ ਐਮ.ਪੀ.ਲੈਡ ਸਕੀਮ ਤਹਿਤ ਖਰਚ ਕੀਤੀ ਗਈ ਗਰਾਂਟ ਬਾਰੇ 5 ਅਕਤੂਬਰ 2015 ਨੂੰ ਸੂਚਨਾ ਅਧਿਕਾਰ ਤਹਿਤ ਜਾਣਕਾਰੀ ਮੰਗੀ ਸੀ। ਸੂਚਨਾ ਅਧਿਕਾਰੀ ਵਲੋਂ ਮਿਤੀ 26 ਨਵੰਬਰ 15 ਨੂੰ ਅਧੂਰੀ ਜਾਣਕਾਰੀ ਦਿੰਦਿਆਂ ਰਿਕਾਰਡ ਦਫਤਰ ਵਿੱਚ ਉਪਲਬਧ ਨਾ ਹੋਣ ਦੀ ਜਾਣਕਾਰੀ ਦਿੱਤੀ। ਇਸਤੋਂ ਪਹਿਲਾਂ ਵੀ ਕਾਰਜ ਸਾਧਕ ਅਫਸਰ ਵਲੋਂ ਮਿਤੀ 13 ਅਗਸਤ 2105, ਮਿਤੀ 16 ਸਤੰਬਰ 2015 ਨੂੰ ਅਧੂਰੀ ਜਾਣਕਾਰੀ ਦਿੱਤੀ ਗਈ ਸੀ। ਇਸਤੋਂ ਬਾਅਦ ਸ਼ਿਕਾਇਤਕਰਤਾ ਜੈ ਸਿੰਘ ਛਿੱਬਰ ਨੇ 3 ਦਸੰਬਰ 2015 ਨੂੰ ਮੁੱਖ ਸੂਚਨਾ ਕਮਿਸ਼ਨਰ ਪੰਜਾਬ, ਚੰਡੀਗੜ ਦੀ ਅਦਾਲਤ ਵਿੱਚ ਸ਼ਿਕਾਇਤ/ ਅਪੀਲ ਦਰਜ ਕਰਵਾਈ ਸੀ। 
ਸੂਚਨਾ ਕਮਿਸ਼ਨਰ ਯਸ਼ਵੀਰ ਮਹਾਜਨ ਨੇ ਸੂਚਨਾ ਅਧਿਕਾਰੀ ਕਮ ਕਾਰਜ ਸਾਧਕ ਅਫਸਰ ਨਗਰ ਕੌਂਸਲ ਮੋਰਿੰਡਾ ਨੂੰ ਸੂਚਨਾ ਦੇਣ ਲਈ ਚਾਰ ਪੰਜ ਮੌਕੇ ਦਿੱਤੇ ਗਏ। ਪਰ ਕਾਰਜ ਸਾਧਕ ਅਫਸਰ ਸਿਕਾਇਤਕਰਤਾ ਨੂੰ ਮੋਰਿੰਡਾ ਸ਼ਹਿਰ ਵਿੱਚ ਉਸਾਰੇ ਕਮਿਉਨਿਟੀ ਸੈਂਟਰ ਦੀ ਅਸਲ ਲੋਕੇਸ਼ਨ ਬਾਰੇ ਦੱਸ ਨਹੀਂ ਸਕੇ। ਦਿਲਚਸਪ ਗੱਲ ਇਹ ਹੈ ਨਗਰ ਕੌਂਸਲ ਮੋਰਿੰਡਾ ਵਲੋਂ ਡਿਪਟੀ ਕਮਿਸ਼ਨਰ ਰੂਪਨਗਰ ਨੂੰ ਦਿੱਤੇ ਗਏ ਵਰਤੋ ਸਰਟੀਫਿਕੇਟ 'ਚ ਵਾਰਡ ਨੰਬਰ 8 ਤੇ ਵਾਰਡ ਨੰਬਰ 6 (ਪੁਰਾਣਾ) ਵਿੱਚ ਕਮਿਉਨਿਟੀ ਸੈਂਟਰ ਤੇ ਗਰਾਂਟ ਖਰਚ ਕਰਨ ਦਾ ਪੱਤਰ ਭੇਜਿਆ ਗਿਆ ਹੈ, ਇਹ ਸਰਟੀਫਿਕੇਟ ਨਗਰ ਕੌਂਸਲ ਮੋਰਿੰਡਾ ਵਲੋਂ ਸੂਚਨਾ ਕਮਿਸ਼ਨਰ ਦੀ ਕੋਰਟ ਵਿੱਚ ਪ੍ਰਾਰਥੀ ਨੂੰ ਦਿੱਤਾ ਗਿਆ। ਜਦੋਂ ਕਿ ਹਕੀਕਤ ਇਹ ਹੈ ਕਿ ਮੋਰਿੰਡਾ ਸ਼ਹਿਰ ਵਿੱਚ ਕੋਈ ਕਮਿਉਨਿਟੀ ਸੈਂਟਰ ਨਹੀਂ ਹੈ। ਸ਼ਿਕਾਇਤਕਰਤਾ ਨੇ ਸ਼ੱਕ ਪ੍ਰਗਟ ਕੀਤਾ ਹੈ ਕਿ ਕਮਿਉਨਿਟੀ ਸੈਂਟਰ ਦੇ ਨਾਮ 'ਤੇ ਸਰਕਾਰੀ ਅਧਿਕਾਰੀਆਂ ਵਲੋਂ ਠੇਕੇਦਾਰਾਂ ਤੇ ਕੁੱਝ ਪ੍ਰਾਈਵੇਟ ਵਿਅਕਤੀਆਂ ਨਾਲ ਰਲਕੇ ਸਰਕਾਰੀ ਗਰਾਂਟ ਨੂੰ ਖੁਰਦ ਬੁਰਦ ਕੀਤਾ ਗਿਆ ਹੈ। ਸ਼ਿਕਾਇਤਕਰਤਾ ਜੈ ਸਿੰਘ ਛਿੱਬਰ ਨੇ ਮਾਮਲੇਂ ਦੀ ਉਚ ਪੱਧਰੀ ਜਾਂਚ ਅਤੇ ਗਰਾਂਟ ਖੁਰਦ ਬੁਰਦ ਕਰਨ ਵਾਲੇ ਅਧਿਕਾਰੀਆਂ, ਕੌਂਸਲਰਾਂ, ਠੇਕੇਦਾਰਾਂ ਦੇ ਖਿਲਾਫ 'ਤੇ ਧੋਖਾਧੜੀ ਦਾ ਕੇਸ ਦਰਜ ਕਰਨ ਅਤੇ ਦੋਸ਼ੀਆਂ ਕੋਲੋਂ ਵਿਆਜ ਸਮੇਤ ਸਾਰੀ ਰਕਮ ਸਰਕਾਰੀ ਖਜ਼ਾਨੇ ਵਿੱਚ ਜਮਾ ਕਰਵਾਉਣ ਲਈ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਵਿੱਚ ਪਟਿਸ਼ਨ ਦਾਇਰ ਕੀਤੀ ਜਾਵੇਗੀ।  

ਪੰਜਾਬ ਚੋਣਾਂ 'ਚ ਛੇ ਹਜ਼ਾਰ ਥਾਵਾਂ 'ਤੇ ਹਿੰਸਕ ਘਟਨਾਵਾਂ ਵਾਪਰਨ ਦਾ ਖਦਸ਼ਾਂ

ਪੰਜਾਬ ਨਾਲ ਲੱਗਦੀਆਂ ਸਾਰੀਆਂ ਹੱਦਾਂ ਸੀਲ, ਰੈਡ ਅਲਰਟ ਜਾਰੀ
ਅੰਤਰ ਰਾਜੀ 200 ਨਾਕੇ ਅਤੇ ਬਾਰਡਰ ਰੇਂਜ 'ਚ 60 ਨਾਕੇ ਲਗਾਏ
ਚੰਡੀਗੜ 4 ਜਨਵਰੀ ( ਜੈ ਸਿੰਘ ਛਿੱਬਰ) : ਪੰਜਾਬ ਵਿਧਾਨ ਸਭਾ ਦੀਆਂ 4 ਫਰਵਰੀ ਨੂੰ ਹੋਣ ਵਾਲੀਆਂ ਚੋਣਾਂ 'ਚ ਚੋਣ ਕਮਿਸ਼ਨ ਨੂੰ ਛੇ ਹਜ਼ਾਰ ਥਾਵਾਂ ਤੇ ਹਿੰਸਕ ਘਟਨਾਵਾਂ ਵਾਪਰਨ ਦਾ ਖਦਸ਼ਾਂ ਹੈ। ਉਧਰ ਚੋਣ ਜਾਬਤਾ ਲੱਗਣ ਸਾਰ ਪੰਜਾਬ ਨਾਲ ਲੱਗਦੀਆਂ ਹਰਿਆਣਾ, ਹਿਮਾਚਲ ਪ੍ਰਦੇਸ਼, ਜੰਮੂ ਕਸ਼ਮੀਰ ਅਤੇ ਰਾਜਸਥਾਨ ਦੀਆਂ ਹੱਦਾਂ ਨੂੰ ਸੀਲ ਕਰ ਦਿੱਤਾ ਗਿਆ ਅਤੇ ਪੰਜਾਬ 'ਚ ਰੈਡ ਅਲਰਟ ਵੀ ਜਾਰੀ ਕਰ ਦਿੱਤਾ ਗਿਆ ਹੈ। ਸੱਭ ਤੋਂ ਵੱਡੀ ਗੱਲ ਇਹ ਹੈ ਕਿ ਪੰਜਾਬ ਦੇ ਹਰੇਕ ਪੋਲਿੰਗ ਬੂਥ 'ਤੇ ਚੋਣ ਕਮਿਸ਼ਨ ਵਲੋਂ ਵੀ ਇੱਕ ਬੂਥ ਲਗਾਇਆ ਜਾਵੇਗਾ ਜਿਥੇ ਵੋਟਰਾਂ ਨੂੰ ਵੋਟ ਪਾਉਣ ਤੇ ਵੋਟ ਬਾਰੇ ਪੂਰੀ ਜਾਣਕਾਰੀ ਦਿੱਤੀ ਜਾਵੇਗੀ।
ਪੰਜਾਬ ਦੇ ਮੁੱਖ ਚੋਣ ਅਫਸਰ ਵੀ.ਕੇ ਸਿੰਘ ਨੇ ਅੱਜ ਸ਼ਾਮੀ ਪ੍ਰੈਸ ਕਾਨਫਰੰਸ ਦੌਰਾਨ ਇਹ ਖੁਲਾਸਾ ਕੀਤਾ ਹੈ। ਉਹਨਾਂ ਦੱਸਿਆਂ ਕਿ ਕਮਿਸ਼ਨ  ਭੈ ਮੁਕਤ, ਸ਼ਾਂਤੀ ਨਾਲ ਚੋਣਾਂ ਕਰਵਾਉਣ ਲਈ ਬਚਨਬੱਧ ਹੈ। ਉਹਨਾਂ ਦੱਸਿਆਂ ਕਿ ਚੋਣਾਂ ਦੌਰਾਨ ਚਾਰ ਹਜ਼ਾਰ ਬੂਥਾਂ 'ਤੇ ਵੈਬ ਰਿਕਾਡਿੰਗ ,ਲਾਈਵ ਪੋਲਿੰਗ ਹੋਵੇਗੀ, ਭਾਰਤ ਦੇ ਮੁੱਖ ਚੋਣ ਕਮਿਸ਼ਨ ਸਮੇਤ ਕੋਈ ਵੀ ਇਹਨਾਂ ਬੂਥਾਂ ਦਾ ਅੱਖੀ ਡਿੱਠਾ ਹਾਲ ਦੇਖ ਸਕੇਗਾ। ਉਹਨਾਂ ਦੱਸਿਆਂ ਕਿ ਪੰਜਾਬ 'ਚ ਚੋਣ ਜਾਬਤਾ ਲਾਗੂ ਹੋ ਗਿਆ ਹੈ ਅਤੇ ਸਾਰੀਆਂ ਜਨਤਕ ਥਾਵਾਂ ਤੋਂ 72 ਘੰਟੇ ਦੇ ਅੰਦਰ ਅੰਦਰ ਸਰਕਾਰੀ ਇਸ਼ਤਿਹਾਰਬਾਜ਼ੀ , ਹੋਰਡਿੰਗ, ਬੈਨਰ ਆਦਿ ਉਤਾਰਨ ਦੇ ਆਦੇਸ਼ ਜਾਰੀ ਕਰ ਦਿੱਤੇ ਗਏ ਹਨ। ਜੇਕਰ ਕਿਸੇ ਨਿੱਜੀ ਥਾਂ 'ਤੇ ਲੱਗੇ ਬੋਰਡ,ਹੋਰਡਿੰਗ, ਬੈਨਰ ਦੀ ਮੰਜੂਰੀ ਨਾ ਹੋਈ ਤਾਂ ਉਹ ਵੀ ਉਤਾਰ ਦਿੱਤੇ ਜਾਣਗੇ। ਚੋਣਾਂ ਡਰ ਮੁਕਤ ਕਰਵਾਉਣ ਅਤੇ ਚੋਣਾਂ ਦੌਰਾਨ ਨਜਾਇਜ ਹਥਿਆਰਾਂ, ਨਸ਼ਾ ਤਸਕਰੀ, ਕਰੰਸੀ ਦੀ ਸਪਲਾਈ ਰੋਕਣ 'ਤੇ ਚੋਣ ਕਮਿਸ਼ਨ ਅਤੇ ਪੁਲਿਸ ਪ੍ਰਸ਼ਾਸਨ ਦੀ ਪੈਨੀ ਨਜ਼ਰ ਹੋਵੇਗੀ। ਇਸੀ ਤਰ•ਾਂ ਪੁਲਿਸ ਪ੍ਰਸ਼ਾਸ਼ਨ ਵਲੋਂ ਪੰਜਾਬ ਦੀਆਂ ਵੱਖ ਵੱਖ ਥਾਵਾਂ ' ਤੇ 500 ਤੋਂ ਅਧਿਕ ਥਾਵਾਂ 'ਤੇ ਨਾਕੇ ਲਗਾਏ ਜਾਣਗੇ। ਅੰਤਰ ਰਾਜੀ ਸੀਮਾਵਾਂ 'ਤੇ 200 ਨਾਕੇ, ਬਾਰਡਰ ਰੇਂਜ 'ਤੇ 60 ਨਾਕੇ ਲਗਾਏ ਜਾਣਗੇ। ਪੈਰਾ ਮਿਲਟਰੀ ਫੋਰਸ ਦੀਆਂ 35 ਕੰਪਨੀਆਂ ਪੁੱਜ ਚੁੱਕੀਆਂ ਹਨ ਜਦੋਂ ਕਿ 50 ਕੰਪਨੀਆਂ ਪੈਰਾ ਮਿਲਟਰੀ ਫੋਰਸ ਦੀਆਂ ਤੈਨਾਤ ਕੀਤੀਆਂ  ਜਾਣਗੀਆ ਅਤੇ 8 ਜਨਵਰੀ ਤੱਕ ਪੂਰੀ ਪੁਲਿਸ ਫੋਰਸ ਪੰਜਾਬ 'ਚ ਪੁੱਜ ਜਾਣਗੀਆਂ। ਸੰਵੇਦਨਸ਼ੀਲ ਜਾਂ ਅਤਿ ਸੰਵੇਦਨਸ਼ੀਲ ਹਲਕਿਆਂ ਬਾਰੇ ਪੁੱਛੇ ਗਏ ਸਵਾਲ ਦੇ ਜਵਾਬ ਵਿੱਚ ਚੋਣ ਅਫਸਰ ਨੇ ਦੱਸਿਆਂ ਕਿ ਉਮੀਦਵਾਰ ਸਾਹਮਣੇ ਆਉਣ ਅਤੇ ਚੋਣ ਅਬਜਰਵਰਾਂ ਦੀਆਂ ਰਿਪੋਰਟਾਂ ਤੋਂ ਬਾਅਦ ਹੀ ਇਸ ਅਸਲ ਤੱਥ ਸਾਹਮਣੇ ਆਉਣਗੇ।
ਬਾਕਸ —
ਸਰਕਾਰੀ ਬਿਲ ਪੈਡਿੰਗ ਹੋਣ 'ਤੇ ਹੋ ਸਕਦੀ ਹੈ ਉਮੀਦਵਾਰੀ ਰੱਦ-
ਚੰਡੀਗੜ• ( ਛਿੱਬਰ) : ਚੋਣ ਲੜ ਰਹੇ ਉਮੀਦਵਾਰ ਨੂੰ ਇਸ ਵਾਰ ਨਾਮਜਦਗੀ ਦੇ ਨਾਲ ਨਾਲ ਇੱਕ ਹਲਫੀਆਂਬਿਆਨ ਦੇਣਾ ਹੋਵੇਗਾ ਕਿ ਉਸ ਵੱਲ ਬਿਜਲੀ ਬਿਲ, ਪਾਣੀ ਦਾ ਬਿਲ ਜਾਂ ਕਿਸੀ ਤਰ•ਾਂ ਦਾ ਹੋਰ ਬਿਲ ਜਾਂ ਅਦਾਇਗੀ ਪੈਂਡਿੰਗ ਨਹੀਂ ਹੈ। ਜੇਕਰ ਅਜਿਹਾ ਮਾਮਲਾ ਸਾਹਮਣੇ ਆਇਆ ਤਾਂ ਉਮੀਦਵਾਰੀ ਖਤਰੇ ਵਿੱਚ ਪੈ ਸਕਦੀ ਹੈ। ਇਸ ਤਰ•ਾਂ ਉਮੀਦਵਾਰ 28 ਲੱਖ ਰੁਪਏ ਤੱਕ ਖਰਚ ਕਰ ਸਕਦਾ ਹੈ। ਪੋਲਿੰਗ ਸਟੇਸ਼ਨ ਦੇ ਬਾਹਰ ਲਗਾਏ ਜਾਣ ਵਾਲੇ ਪੋਲਿੰਗ ਬੂਥ ਦਾ ਖਰਚਾ ਉਮੀਦਵਾਰ ਦੇ ਖਰਚੇ ਵਿੱਚ ਸ਼ਾਮਲ ਹੋਵੇਗਾ। ਜਦੋਂਕਿ ਪਹਿਲਾਂ ਪੋਲਿੰਗ ਬੂਥ ਦਾ ਖਰਚਾ ਪਾਰਟੀ ਦੇ ਖਰਚੇ ਵਿੱਚ ਸ਼ਾਮਲ ਕੀਤਾ ਜਾਂਦਾ ਸੀ।

ਅਕਾਲੀ ਦਲ 'ਚ ਜਵਾਈਆਂ ਦੀ ਚੜਾਈ

ਦੂਜੀ ਕਤਾਰ ਦੇ ਆਗੂਆਂ ਦੇ ਪੁੱਤਰਾਂ ਨੂੰ ਵੀ ਟਿਕਟਾਂ ਦਾ ਪ੍ਰਸ਼ਾਦ 
ਚੰਡੀਗੜ 3 ਜਨਵਰੀ ( ਜੈ ਸਿੰਘ ਛਿੱਬਰ) : ਪੰਜਾਬ ਦੀ ਸੱਭ ਤੋਂ ਵੱਡੀ ਖੇਤਰੀ ਪਾਰਟੀ ਅਕਾਲੀ ਦਲ 'ਚ “ਪੁੱਤਰਾਂ ” ਦੇ ਨਾਲ ਨਾਲ ਹੁਣ “ਜਵਾਈਆਂ” ਦੀ ਵੀ ਚੜਾਈ ਹੋ ਗਈ ਹੈ। ਅਕਾਲੀ ਦਲ ਦੇ ਸਰਪ੍ਰਸਤ ਤੇ ਮੁੱਖ ਮੰਤਰੀ ਪਰਕਾਸ਼ ਸਿੰਘ  ਬਾਦਲ ਦੇ ਜਵਾਈ ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ ਤੋਂ ਬਾਅਦ ਹੁਣ ਰਾਜ ਸਭਾ ਮੈਂਬਰ ਤੇ ਅਕਾਲੀ ਦਲ ਦੇ ਸਕੱਤਰ ਜਨਰਲ ਸੁਖਦੇਵ ਸਿੰਘ ਢੀਂਡਸਾ ਅਤੇ ਅਕਾਲੀ ਦਲ ਦੀ ਇਸਤਰੀ ਵਿੰਗ ਦੀ ਪ੍ਰਧਾਨ ਤੇ ਵਿਧਾਇਕ ਬੀਬੀ ਜਗੀਰ ਕੌਰ ਨੇ ਵੀ ਆਪਣੇ “ਜਵਾਈ ਰਾਜਾ” ਨੂੰ ਸਿਆਸਤ 'ਚ ਉਤਾਰ ਦਿੱਤਾ ਹੈ। ਇਹ ਗੱਲ ਵੱਖਰੀ ਹੈ ਕਿ ਬੀਬੀ ਜਗੀਰ ਕੌਰ ਨੇ ਕਾਨੂੰਨੀ ਦਾਅਪੇਚਾਂ 'ਚ ਫਸਣ ਕਾਰਨ ਮਜਬੂਰੀ ਵਿੱਚ ਆਪਣੇ ਜਵਾਈ ਨੂੰ ਟਿਕਟ ਦੁਆਈ ਹੈ। 
ਹੁਣ ਤੱਕ ਸ੍ਰ ਬਾਦਲ ਵਿਰੋਧੀ ਆਗੂ ਬਾਦਲ ਪਰਵਾਰ 'ਤੇ ਪਰਵਾਰਵਾਦ ਨੂੰ ਅੱਗੇ ਲਿਆਉਣ ਦੇ ਦੋਸ਼ ਲਾਉਂਦੇ ਰਹੇ ਹਨ। ਸ੍ਰ ਬਾਦਲ ਵਲੋਂ ਆਪਣੇ ਜਵਾਈ ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ ਨੂੰ ਪੱਟੀ ਹਲਕੇ ਤੋਂ ਉਮੀਦਵਾਰ ਬਣਾਇਆ ਗਿਆ ਹੈ ਅਤੇ ਉਹ ਇਸ ਵਕਤ ਸਰਕਾਰ 'ਚ ਕੈਬਨਿਟ ਮੰਤਰੀ ਦੇ ਅਹੁੱਦੇ 'ਤੇ ਹਨ। ਅੱਜ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਅਕਾਲੀ ਦਲ 'ਚ ਵੱਡੇ ਦਮਦਾਰ ਆਗੂ ਵਜੋਂ ਜਾਣੇ ਜਾਂਦੇ ਸੁਖਦੇਵ ਸਿੰਘ ਢੀਂਡਸਾ ਦੇ ਜਵਾਈ ਸਾਬਕਾ ਆਈ.ਏ.ਐਸ ਅਧਿਕਾਰੀ ਤਜਿੰਦਰ ਸਿੰਘ ਸਿਧੂ ਨੂੰ ਹਲਕਾ ਮੋਹਾਲੀ ਤੋਂ ਉਮੀਦਵਾਰ ਐਲਾਨ ਦਿੱਤਾ ਹੈ। ਜਦੋਂ ਕਿ ਬੀਤੇ ਕੱਲ ਸੋਮਵਾਰ ਨੂੰ ਸ੍ਰੋਮਣੀ ਕਮੇਟੀ ਦੀ ਸਾਬਕਾ ਪ੍ਰਧਾਨ ਬੀਬੀ ਜਗੀਰ ਕੌਰ ਦੇ ਜਵਾਈ ਯੁਵਰਾਜ ਭੁਪਿੰਦਰ ਸਿੰਘ ਨੂੰ ਭੁਲੱਥ ਹਲਕੇ ਤੋਂ ਉਮੀਦਵਾਰ ਘੋਸ਼ਿਤ ਕੀਤਾ ਗਿਆ ਸੀ। ਇਸਤੋਂ ਪਹਿਲਾਂ ਲੰਬਾਂ ਸਮਾਂ ਸ੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਰਹੇ ਪੰਥ ਰਤਨ ਜਥੇਦਾਰ ਗੁਰਚਰਨ ਸਿੰਘ ਟੌਹੜਾ ਦੇ ਜਵਾਈ ਹਰਮੇਲ ਸਿੰਘ ਟੌਹੜਾ 1997 'ਚ ਪਰਕਾਸ਼ ਸਿੰਘ ਬਾਦਲ ਦੀ ਅਗਵਾਈ ਵਾਲੀ ਸਰਕਾਰ 'ਚ ਕੈਬਨਿਟ ਮੰਤਰੀ ਰਹਿ ਚੁੱਕੇ ਹਨ।  
ਜਿਥੇ ਸ੍ਰ ਬਾਦਲ ਵਲੋਂ ਆਪਣੇ ਫਰਜੰਦ ਸੁਖਬੀਰ ਸਿੰਘ ਬਾਦਲ ਨੂੰ ਅਕਾਲੀ ਦਲ ਦੀ ਵਾਗਡੋਰ ਸੌਪਦਿਆਂ ਉਪ ਮੁੱਖ ਮੰਤਰੀ ਦਾ ਅਹੁੱਦਾ ਦਿੱਤਾ ਹੋਇਆ ਹੈ। ਉਥੇ ਅਕਾਲੀ ਦਲ ਦੇ ਦੂਜੀ ਕਤਾਰ ਦੇ ਆਗੂਆਂ ਸੁਖਦੇਵ ਸਿੰਘ ਢੀਂਡਸਾ ਦੇ ਪੁੱਤਰ ਪਰਮਿੰਦਰ ਸਿੰਘ ਢੀਂਡਸਾ, ਰਤਨ ਸਿੰਘ ਅਜਨਾਲਾ ਦਾ ਬੇਟਾ ਅਮਰਪਾਲ ਸਿੰਘ  ਬੋਨੀ ਅਜਨਾਲਾ, ਰਣਜੀਤ ਸਿੰਘ ਬ੍ਰਹਮਪੁਰਾ ਦਾ ਬੇਟਾ ਰਵਿੰਦਰ ਸਿੰਘ ਬ੍ਰਹਮਪੁਰਾ, ਜਥੇਦਾਰ ਤੋਤਾ ਸਿੰਘ ਦਾ  ਬੇਟਾ ਮੱਖਣ ਬਰਾੜ, ਬਲਵਿੰਦਰ ਸਿੰਘ ਭੁੰਦੜ , ਪ੍ਰੋ ਪ੍ਰੇਮ ਸਿੰਘ ਚੰਦੂਮਾਜਰਾ ਦੇ ਬੇਟੇ ਹਰਿੰਦਰਪਾਲ ਸਿੰਘ ਚੰਦੂਮਾਜਰਾ ਨੂੰ ਵੀ ਅਕਾਲੀ ਦਲ ਵਲੋਂ ਉਮੀਦਵਾਰ ਐਲਾਨਿਆਂ ਗਿਆ ਹੈ। ਸਿਆਸੀ ਪੰਡਤਾਂ ਦਾ ਮੰਨਣਾ ਹੈ ਕਿ ਦੂਜੀ ਕਤਾਰ ਦੇ ਆਗੂਆਂ ਦੇ ਪੁੱਤਰਾਂ ਨੂੰ ਟਿਕਟਾਂ ਦੇ ਕੇ ਇਕ ਤਰ•ਾਂ ਨਾਲ ਉਹਨਾਂ ਦਾ ਸੁਖਬੀਰ ਸਿੰਘ ਬਾਦਲ ਦੇ ਖਿਲਾਫ ਬੋਲਣ ਤੋਂ ਮੂੰਹ ਬੰਦ ਕਰ ਦਿੱਤਾ ਗਿਆ ਹੈ।  

ਸਿਆਸਤ ਦੇ ਕਲਾਕਾਰ --- ਵੋਟਰਾਂ ਨੂੰ ਭਰਮਾਉਣ ਲਈ ਸਿਆਸੀ ਪਾਰਟੀਆਂ ਨੇ ਕਲਾਕਾਰਾਂ ਨੂੰ ਬਣਾਇਆ ਸਿਆਸਤਦਾਨ

ਸਦੀਕ ਵਿਧਾਇਕ ਤੇ ਭਗਵੰਤ ਮਾਨ ਬਣ ਚੁੱਕੇ ਹਨ ਸਾਂਸਦ 
ਭਾਜਪਾ ਹੰਸ ਰਾਜ ਹੰਸ ਤੇ ਮਿਸ ਪੂਜਾ 'ਤੇ ਦਾਅ ਖੇਡਣ ਦੀ ਤਿਆਰੀ 'ਚ 
ਚੰਡੀਗੜ, 1 ਜਨਵਰੀ ( ਜੈ ਸਿੰਘ ਛਿੱਬਰ) : ਪੰਜਾਬ ਦੇ ਕਲਾਕਾਰਾਂ, ਗਾਇਕਾਂ 'ਤੇ ਵੀ ਸਿਆਸਤ ਦਾ ਰੰਗ ਚੜ ਗਿਆ ਹੈ। ਕੋਈ ਸਮਾਂ ਸੀ ਜਦੋਂ ਗਾਇਕ, ਕਲਾਕਾਰ ਸਿਆਸਤ, ਮਜਹਬ ਤੋਂ ਦੂਰ ਰਹਿੰਦੇ ਸਨ ਤੇ ਸਿਰਫ ਕਲਾ ਨੂੰ ਪਿਆਰ ਕਰਦੇ ਸਨ। ਪਰ, ਸਿਆਸੀ ਪਾਰਟੀਆਂ ਵਲੋਂ ਨਾਮੀ ਗਾਇਕਾਂ, ਕਲਾਕਾਰਾਂ, ਗੀਤਕਾਰਾਂ ਦੀ ਲੋਕ ਪ੍ਰਿਯਤਾ ਦਾ ਫਾਇਦਾ ਉਠਾਉਣ ਨਾਲ ਪਾਰਟੀਆਂ 'ਚ ਸ਼ਾਮਲ ਕਰਨ ਤੋਂ ਬਾਅਦ ਕਲਾਕਾਰਾਂ ਦਾ ਨਾਮ ਸਿਆਸੀ ਪਾਰਟੀਆਂ ਨਾਲ ਜੁੜਕੇ ਰਹਿ ਗਿਆ ਹੈ। 
ਪੰਜਾਬ ਦੀਆਂ ਲੱਗਭੱਗ ਸਾਰੀਆਂ ਸਿਆਸੀ ਪਾਰਟੀਆਂ 'ਚ ਕਲਾਕਾਰਾਂ ਨੇ ਐਂਟਰੀ ਮਾਰੀ ਹੈ। ਲੋਕ ਗਾਇਕ ਵਜੋਂ ਜਾਣੇ ਜਾਂਦੇ ਮਹੁੰਮਦ ਸਦੀਕ ਪੰਜਾਬ ਵਿਧਾਨ ਸਭਾ ਅਤੇ ਕਮੇਡੀਅਨ ਭਗਵੰਤ ਮਾਨ ਲੋਕ ਸਭਾ 'ਚ ਪੁੱਜ ਚੁੱਕੇ ਹਨ। ਇਹਨਾਂ ਦੋਵੇਂ ਕਲਾਕਾਰਾਂ ਵਲੋਂ ਸਿਆਸਤ 'ਚ ਵੀ ਆਪਣੀ ਪੈਂਠ ਬਨਾਉਣ ਤੋਂ ਬਾਅਦ ਹੋਰਨਾਂ ਕਲਾਕਾਰਾਂ ਨੇ ਸਿਆਸਤ ਵਲ ਰੁਖ ਕੀਤਾ ਹੈ। 
ਰਾਜ ਗਾਇਕ ਵਜੋਂ ਜਾਣੇ ਜਾਂਦੇ ਹੰਸ ਰਾਜ ਹੰਸ, ਨੋਜਵਾਨ ਮੁੰਡੇ ਕੁੜੀਆਂ ਦੀ  ਚਹੇਤੀ ਗਾਇਕਾਂ ਮਿਸ ਪੂਜਾ ਤੇ ਰਣਜੀਤ ਮਣੀ ਭਾਰਤੀ ਜਨਤਾ ਪਾਰਟੀ 'ਚ ਸ਼ਾਮਲ ਹੋ ਕੇ ਕਲਾਕਾਰ ਦੇ ਨਾਲ ਨਾਲ ਭਾਜਪਾਈ ਬਣ ਚੁੱਕੇ ਹਨ। 
ਜਦੋਂਕਿ ਮਹੁੰਮਦ ਸਦੀਕ ਪਿਛਲੇ ਕਈ ਦਹਾਕਿਆਂ ਤੋਂ ਕਾਂਗਰਸ ਨਾਲ ਜੁੜੇ ਹੋਏ ਹਨ। ਇਸਤੋਂ ਇਲਾਵਾ ਮਸ਼ਹੂਰ ਗਾਇਕ ਬਲਕਾਰ ਸਿੱਧੂ, ਗਾਇਕਾ ਸਤਵਿੰਦਰ ਬਿੱਟੀ ਨੇ  ਵੀ ਕਾਂਗਰਸ ਦਾ ਹੱਥ ਫੜਿਆ ਹੋਇਆ ਹੈ। 
ਉਘੇ ਕਮੇਡੀਅਨ ਭਗਵੰਤ ਮਾਨ ਜਿਥੇ ਮੈਂਬਰ ਪਾਰਲੀਮੈਂਟ ਬਣ ਚੁਕੇ ਹਨ, ਉਥੇ ਆਪ ਦੇ ਪ੍ਰਚਾਰ ਕਮੇਟੀ ਦੇ ਚੇਅਰਮੈਨ ਤੇ ਸਟਾਰ ਪ੍ਰਚਾਰਕ ਹਨ। ਇਸੀ ਤਰ•ਾਂ ਕਮੇਡੀਅਨ ਗੁਰਪ੍ਰੀਤ ਸਿੰਘ ਘੁੱਗੀ (ਵੜੈਚ) ਨੂੰ ਆਪ ਨੇ ਕਨਵੀਨਰ ਬਣਾਇਆ ਹੋਇਆ ਹੈ। ਜਦਕਿ ਦੇਵ ਮਾਨ ਨੂੰ ਨਾਭਾ ਤੋਂ ਉਮੀਦਵਾਰ ਬਣਾਇਆ ਗਿਆ ਹੈ। ਇਸੀ ਤਰ•ਾਂ ਉਘੇ ਗੀਤਕਾਰ ਬਚਨ ਬੇਦਿਲ ਨੇ ਕਮਲ ਦੇ ਨਾਲ ਨਾਲ ਝਾੜੂ ਵੀ ਚੁੱਕਿਆ ਹੋਇਆ ਹੈ। ਜੱਸੀ ਜਸਰਾਜ ਨੇ ਵੀ ਝਾੜੂ ਚੁੱਕਿਆ ਹੋਇਆ ਹੈ, ਇਹ ਗੱਲ ਵੱਖਰੀ ਹੈ ਕਿ ਉਹ ਆਪ ਲੀਡਰਸ਼ਿਪ ਤੋਂ ਨਰਾਜ ਚੱਲ ਰਹੇ ਹਨ। 
ਕਲਾਕਾਰਾਂ ਨੂੰ ਨਾਲ ਜੋੜਨ 'ਚ ਅਕਾਲੀ ਦਲ ਵੀ ਪਿੱਛੇ ਨਹੀਂ ਰਿਹਾ। ਉਹ ਵੀ ਸਮਾਂ ਸੀ ਜਦੋਂ ਅਕਾਲੀ ਦਲ 'ਚ ਢਾਡੀਆਂ ਨੂੰ ਵੱਧ ਮਹੱਤਤਾਂ ਦਿੱਤੀ ਜਾਂਦੀ ਸੀ, ਪਰ ਬਦਲਦੇ ਹਲਾਤਾਂ ਮੁਤਾਬਕ ਅਕਾਲੀ ਦਲ ਨੇ ਵੀ ਗਾਇਕਾਂ,ਕਲਾਕਾਰਾਂ ਨੂੰ ਪਾਰਟੀ 'ਚ ਸ਼ਾਮਲ ਕੀਤਾ ਹੈ। ਪਿਛਲੇ ਦਸ ਸਾਲਾਂ ਤੋਂ ਸੱਤਾ ਦਾ ਸੁਖ ਭੋਗ ਰਹੇ ਅਕਾਲੀ ਦਲ ਨੇ ਉਘੀ ਐਂਕਰ ਸਤਿੰਦਰ ਸੱਤੀ ਨੂੰ ਪੰਜਾਬ ਕਲਾ ਪ੍ਰੀਸ਼ਦ ਦਾ ਚੇਅਰਮੈਨ ਨਿਯੁਕਤ ਕਰ ਦਿੱਤਾ। ਇਸੀ ਤਰ•ਾਂ ਲੰਬੀ ਹੇਕ ਤੇ ਦਮਦਾਰ ਅਵਾਜ਼ ਦੀ ਮਾਲਕ ਸੁਖੀ ਬਰਾੜ ਨੂੰ ਮੁੱਖ ਮੰਤਰੀ ਪਰਕਾਸ਼ ਸਿੰਘ ਬਾਦਲ ਦੀ ਸੱਭਿਆਚਾਰਕ ਸਲਾਹਕਾਰ ਵਜੋਂ ਨਿਯੁਕਤ ਕੀਤਾ ਗਿਆ ਹੈ। ਸਾਹਿਤ ਤੇ ਕਲਾ ਨਾਲ ਜੁੜੇ ਇਹ ਕਲਾਕਾਰ ਤਾਂ ਉਹ ਹਨ ਜਿਹੜੇ ਸਿੱਧੇ ਤੌਰ 'ਤੇ ਪਾਰਟੀਆਂ 'ਚ ਸ਼ਾਮਲ ਹੋ ਚੁੱਕੇ ਹਨ ਜਦੋਂ ਕਿ ਕੁੱਝ ਅਜਿਹੇ ਵੀ ਹਨ ਜੋ ਪਰਦੇ ਪਿਛੇ ਆਪਣੀ ਕਲ•ਾ ਦੇ ਜੌਹਰ ਦਿਖਾ ਰਹੇ ਹਨ। 
ਕਲਾਕਾਰਾਂ ਨੂੰ ਪਾਰਟੀਆਂ 'ਚ ਸ਼ਾਮਲ ਕਰਨ ਬਾਰੇ ਉਘੇ ਪੱਤਰਕਾਰ ਮਨਜੀਤ ਸਿੰਘ ਟਿਵਾਣਾ ਦਾ ਕਹਿਣਾ ਹੈ ਕਿ ਭਾਰਤੀ ਵੋਟਰ ਵਲੋਂ ਨੀਤੀਆਂ, ਏਜੰਡੇ ਜਾਂ ਮੁੱਦਿਆਂ ਦੀ ਬਜਾਏ ਚੇਹਰਾ ਦੇਖਕੇ ਵੋਟ ਦਾ ਇਸਤੇਮਾਲ ਕਰ ਰਿਹਾ ਹੈ। ਜਿਸ ਕਰਕੇ ਵੋਟ ਬੈਂਕ ਨੂੰ ਕੈਸ਼ ਕਰਨ ਲਈ ਰਾਜਨੀਤਿਕ ਪਾਰਟੀਆਂ ਵਲੋਂ ਜਾਣੇ ਪਹਿਚਾਣੇ ਚੇਹਰੇ ਤੇ ਸੈਲੀਬ੍ਰੇਟੀਆਂ ਨੂੰ ਪਾਰਟੀਆਂ ਵਿੱਚ ਸ਼ਾਮਲ ਕੀਤਾ ਜਾਂਦਾ ਹੈ। ਸ੍ਰੀ ਟਿਵਾਣਾ ਦਾ ਮੰਨਣਾ ਹੈ ਕਿ ਲੋਕੀ ਜਾਂ ਕਲ•ਾ ਪ੍ਰੇਮੀ ਕਿਸੇ ਗਾਇਕ ਜਾਂ ਕਲਾਕਾਰ ਦਾ ਸਤਿਕਾਰ ਕਲਾਕਾਰ ਵਜੋਂ ਕਰਦੇ ਹਨ ਪਰ ਜਦੋਂ ਕੋਈ ਕਲਾਕਾਰ ਕਿਸੇ ਪਾਰਟੀ ਦਾ ਹੱਥ ਠੋਕਾ ਬਣਕੇ ਰਹਿ ਜਾਂਦਾ ਹੈ। ਇਹ ਅਸਿੱਧੇ ਰੂਪ ਵਿੱਚ ਲੋਕਾਂ ਨਾਲ ਧੋਖਾ ਹੈ। ਉਹਨਾਂ ਕਿਹਾ ਕਿ ਪੱਤਰਕਾਰ, ਕਮੇਡੀਅਨ ਅਤੇ ਸਾਹਿਤਕਾਰ ਸਿੱਧੇ ਅਸਿੱਧੇ ਤੌਰ 'ਤੇ ਸਿਆਸਤਦਾਨਾਂ 'ਤੇ ਵਿਅੰਗ ਕਰਦੇ ਹੋਏ ਸਮਾਜਕ ਬੁਰਾਈਆਂ ਅਤੇ ਪ੍ਰਸ਼ਾਸਨਿਕ ਸਿਸਟਮ ਦੀਆਂ ਉਣਤਾਈਆਂ ਨੂੰ ਉਜਾਗਰ ਕਰਦੇ ਹਨ। ਉਹਨਾਂ ਦਾ ਸਿਆਸਤ ਨਾਲ ਜੁੜਨਾ ਕਿਸੇ ਹੱਦ ਤਕ ਜਾਇਜ਼ ਵੀ ਮੰਨਿਆਂ ਜਾ ਸਕਦਾ ਹੈ, ਪਰੰਤੂ ਫਿਲਮੀ ਸਿਤਾਰਿਆਂ ਤੇ ਗਾਇਕਾਂ, ਕਲਾਕਾਰਾਂ ਨੂੰ ਸਿਆਸਤ ਬਾਰੇ ਕੋਈ ਬਹੁਤੀ ਜਾਣਕਾਰੀ ਨਹੀਂ ਹੁੰਦੀ। ਪਰ ਬਦਲਦੇ ਹਲਾਤਾਂ ਨੇ ਕਲਾਲਾਕਾਂ ਨੂੰ ਸਿਆਸਤ ਦੇ ਕਲਾਕਾਰ ਵੀ ਬਣਾ ਦਿੱਤਾ ਹੈ।