ਵਾਹ ਪੁਲਿਸ! ਭਗੌੜੇ ਆਗੂ ਦੇ ਸੁਰੱਖਿਆ ਮੁਲਾਜ਼ਮ ਪਰਿਵਾਰ ਦੀ ਸੇਵਾ 'ਚ ਤਾਇਨਾਤ

--ਅਪਰਾਧਿਕ ਮਾਮਲੇ ਵਿਚ ਦੋ ਮਹੀਨਿਆਂ ਤੋਂ ਫਰਾਰ ਹੈ ਸ਼ਿਵ ਸੈਨਾ ਪ੍ਰਧਾਨ 
--13 ਗੰਨਮੈਨ ਤੇ ਸਰਕਾਰੀ ਜਿਪਸੀ ਦੀ ਸੁਰੱਖਿਆ 

ਜੈ ਸਿੰਘ ਛਿੱਬਰ, 
ਚੰਡੀਗੜ੍ਹ : ਦੋ ਮਹੀਨਿਆਂ ਤੋਂ ਭਗੌੜੇ ਸ਼ਿਵ ਸੈਨਾ ਪੰਜਾਬ ਦੇ ਪ੍ਰਧਾਨ ਸੂਧੀਰ ਕੁਮਾਰ ਸੂਰੀ ਦਾ ਸੁਰਾਗ ਲਾਉਣ ਵਿਚ ਅੰਮ੍ਰਿਤਸਰ ਪੁਲਿਸ ਨਾਕਾਮ ਰਹੀ ਹੈ। ਹੈਰਾਨੀ ਦੀ ਗੱਲ ਹੈ ਕਿ ਪੁਲਿਸ ਨੇ ਸ਼ਿਵ ਸੈਨਾ ਪੰਜਾਬ ਦੇ ਪ੍ਰਧਾਨ ਦੀ ਸੁਰੱਖਿਆ ਛੱਤਰੀ ਵਿਚ ਤਾਇਨਾਤ ਕੀਤੇ ਸਰਕਾਰੀ ਜਿਪਸੀ ਤੇ ਇਕ ਦਰਜ਼ਨ ਪੁਲਿਸ ਮੁਲਾਜ਼ਮਾਂ ਨੂੰ ਹਟਾਉਣ ਜਾਂ ਬਦਲਣ ਦੀ ਪ੍ਰੀਕ੍ਰਿਆਂ ਸ਼ੁਰੂ ਕਰਨ ਦੀ ਬਜਾਏ ਸੁਰੱਖਿਆ ਮੁਲਾਜ਼ਮਾਂ ਨੂੰ ਪਰਿਵਾਰ ਦੀ ਸੁਰੱਖਿਆ 'ਤੇ ਤਾਇਨਾਤ ਕਰ ਦਿੱਤਾ ਹੈ। ਇਹ ਖੁਲਾਸਾ ਅੰਮ੍ਰਿਤਸਰ ਪੁਲਿਸ ਕਮਿਸ਼ਨਰ ਦੇ ਥਾਣੇਦਾਰ ਨੇ ਅਨੁਸੂਚਿਤ ਜਾਤੀ ਕਮਿਸ਼ਨ ਦੇ ਦਫ਼ਤਰ ਵਿਚ ਪੇਸ਼ ਹੋ ਕੇ ਦਿੱਤੀ ਰਿਪੋਰਟ ਵਿੱਚ  ਕੀਤਾ ਹੈ ਕਿ ਦੋਸ਼ੀ ਵਿਅਕਤੀ ਭਗੌੜਾ ਹੈ ਅਤੇ ਪੁਲਿਸ ਨੇ ਅਦਾਲਤ ਤੋਂ ਦੋਸ਼ੀ ਦੇ ਗ੍ਰਿਫ਼ਤਾਰੀ ਵਾਰੰਟ ਹਾਸਲ ਕਰ ਲਏ ਹਨ।
ਮਾਮਲੇ ਦੀ ਸੁਣਵਾਈ ਅੰਮ੍ਰਿਤਸਰ ਪੁਲਿਸ ਕਮਿਸ਼ਨਰ ਦੇ ਥਾਣੇਦਾਰ ਨੂੰ ਜਦੋਂ ਪੰਜਾਬ ਰਾਜ ਅਨੁਸੂਚਿਤ ਜਾਤੀ ਕਮਿਸ਼ਨ ਨੇ ਦੋਸ਼ੀ ਦੇ ਪਰਿਵਾਰਕ ਮੈਂਬਰਾਂ ਦੀ ਸੁਰੱਖਿਆ ਲਈ ਮੁਲਾਜ਼ਮਾਂ ਦੀ ਤਾਇਨਾਤੀ ਕਰਨ ਦੇ ਆਦੇਸ਼ ਮੰਗੇ ਤਾਂ ਉਹ ਆਦੇਸ਼ ਨਾ ਦਿਖਾ ਸਕੇ। ਕਮਿਸ਼ਨ ਮੈਂਬਰਾਂ ਨੇ ਠਾਣੇਦਾਰ ਨੂੰ ਫਟਕਾਰ ਲਗਾਉਂਦਿਆਂ ਅਗਲੀ ਪੇਸ਼ੀ 'ਤੇ ਪੰਜਾਬ ਸਰਕਾਰ ਵਲੋਂ ਦੋਸ਼ੀ ਦੇ ਪਰਿਵਾਰਕ ਮੈਂਬਰਾਂ ਦੀ ਸੁਰੱਖਿਆ ਵਿਚ ਮੁਲਾਜ਼ਮਾਂ ਦੀ ਤਾਇਨਾਤੀ ਵਾਲੇ ਆਦੇਸ਼ ਪੇਸ਼ ਕਰਨ ਦੇ ਹੁਕਮ ਦਿੱਤੇ ਹਨ। ਥਾਣੇਦਾਰ ਨੇ ਕਮਿਸ਼ਨ ਨੂੰ ਦੱਸਿਆ ਕਿ ਦੋਸ਼ੀ ਦੀ ਲੋਕੇਸ਼ਨ ਗੁਜ਼ਰਾਤ ਦੀ ਆ ਰਹੀ ਹੈ, ਪਰ ਪੁਲਿਸ ਨੇ ਗੁਜ਼ਰਾਤ ਰੇਡ ਮਾਰਨ ਜਾਂ ਗੁਜ਼ਰਾਤ ਪੁਲਿਸ ਨਾਲ ਰਾਬਤਾ ਬਣਾਉਣ  ਬਾਰੇ ਕਮਿਸ਼ਨ ਨੂੰ ਕੁੱਝ ਨਹੀਂ ਦੱਸਿਆ। ਜਦੋਂ ਕਿ ਪਹਿਲਾਂ ਪੁਲਿਸ ਦੋਸ਼ੀ ਦੀ ਲੋਕੇਸ਼ਨ ਸਿਰੜੀ ਮੰਦਰ, ਮਹਾਰਾਸ਼ਟਰ ਦੀ ਦੱਸਦੀ ਸੀ। 

ਇਹ ਹੈ ਪੁਲਿਸ ਦੀ ਕਾਰਵਾਈ-- 
ਪੁਲਿਸ ਕਮਿਸ਼ਨਰ ਅੰਮ੍ਰਿਤਸਰ ਦੇ ਥਾਣੇਦਾਰ ਨੇ ਕਮਿਸ਼ਨ ਨੂੰ ਦਿੱਤੀ ਰਿਪੋਰਟ ਵਿਚ ਦੱਸਿਆ ਕਿ 
ਪੁਲਿਸ ਪਾਰਟੀ ਨੇ17 ਅਪ੍ਰੈਲ 2018 ਨੂੰ ਮੁਕਦਮਾ ਨੰਬਰ 168 ਦਰਜ਼ ਕੀਤਾ। ਮਿਤੀ 22 ਅਪ੍ਰੈਲ ਨੂੰ ਦੋਸ਼ੀ ਸੁਧੀਰ ਕੁਮਾਰ ਸੂਰੀ ਦੀ ਗ੍ਰਿਫਤਾਰੀ ਲਈ ਸ਼ਿਵਾਲਾ ਕਾਲੌਨੀ ਅੰਮ੍ਰਿਤਸਰ ਵਿਚ ਰੇਡ ਕੀਤੀ ਜਿਥੇ ਦੋਸ਼ੀ ਹਾਜ਼ਰ ਨਹੀਂ ਮਿਲਿਆ। ਇਸੀ ਤਰ੍ਹਾਂ ਪੁਲਿਸ ਨੇ 29 ਅਪ੍ਰੈਲ ਨੂੰ ਨੈਸ਼ਨਲ ਸ਼ਾਪਿੰਗ ਕੰਪਲੈਕਸ ਵਿਚ ਦੋਸੀ ਦੇ ਦਫ਼ਤਰ 'ਤੇ ਛਾਪਾ ਮਾਰਿਆ ਜਿਥੇ ਪੁਲਿਸ ਖਾਲੀ ਹੱਥ ਪਰਤੀ। 
1 ਮਈ ਨੂੰ ਵਧੀਕ ਸੈਸ਼ਨ ਜੱਜ ਅੰਮ੍ਰਿਤਸਰ ਦੀ ਅਦਾਲਤ ਨੇ ਦੋਸ਼ੀ ਸੁਧੀਰ ਕੁਮਾਰ ਸੂਰੀ ਦੀ ਅਗੇਤੀ ਜਮਾਨਤ ਦੀ ਅਰਜੀ ਰੱਦ ਕੀਤੀ।  ਪੁਲਿਸ ਨੇ ਗੈਰ ਜਮਾਨਤੀ ਵਾਰੰਟ ਹਾਸਲ ਕਰਨ ਲਈ 5 ਮਈ ਨੂੰ ਮਾਣਯੋਗ ਸਤੀਸ਼ ਕੁਮਾਰ ਦੀ ਅਦਾਲਤ ਵਿਚ ਅਰਜ਼ੀ ਦਿੱਤੀ ਅਤੇ ਮਾਣਯੋਗ ਆਰ.ਐਸ.ਬਾਜਵਾ ਦੀ ਅਦਾਲਤ ਨੇ ਪੁਲਿਸ ਨੂੰ 8 ਮਈ ਨੂੰ ਵਾਰੰਟ ਲੈਣ ਦੇ ਹੁਕਮ ਦਿੱਤੇ ਸਨ। ਅਤਿ ਭਰੋਸੇਯੋਗ ਸੂਤਰਾਂ ਤੋਂ ਪਤਾ ਲੱਗਿਆ ਹੈ ਕਿ ਦੋਸ਼ੀ ਨੇ ਸ਼ਿਕਾਇਤਕਰਤਾ ਨਾਲ ਸਮਝੌਤਾ ਕਰਨ ਦੀ ਕੋਸ਼ਿਸ਼ ਵੀ ਕਰ ਰਿਹਾ ਹੈ। 

ਕੀ ਹੈ ਮਾਮਲਾ ---
ਥਾਣਾ ਸਿਵਲ ਲਾਈਨ ਅੰਮ੍ਰਿਤਸਰ ਪੁਲਿਸ ਨੇ ਮਿਤੀ 17 ਅਪ੍ਰੈਲ 2018 ਨੂੰ ਮੇਘਨਾਥ ਅਤੇ ਸ਼ਕਤੀ ਕਲਿਆਣ ਦੀ ਸ਼ਿਕਾਇਤ ਦੇ ਆਧਾਰ 'ਤੇ ਸ਼ਿਵ ਸੈਨਾ ਪੰਜਾਬ ਦੇ ਪ੍ਰਧਾਨ ਸੁਧੀਰ ਸੂਰੀ ਦੇ ਖਿਲਾਫ਼ ਮੁਕਦਮਾ ਨੰਬਰ 168 ਧਾਰਾ 3(1) ਐਸ.ਸੀ ਐਂਡ ਐਸ.ਟੀ ਪ੍ਰੋਵੈਸ਼ਨ ਐਂਡ ਐਟਰੋਸਿਟੀ ਐਕਟ ਦੇ ਤਹਿਤ ਕੇਸ ਦਰਜ ਕੀਤਾ ਹੋਇਆ ਹੈ। ਸ਼ਿਵ ਸੈਨਾ ਆਗੂ 'ਤੇ ਦਲਿਤਾਂ ਖਿਲਾਫ਼ ਭੱਦੀ ਭਾਸ਼ਾ ਦਾ ਪ੍ਰਯੋਗ ਕਰਕੇ ਵੀਡੀਓ ਵਾਇਰਲ ਕਰਨ ਦਾ ਦੋਸ਼ ਹੈ।