ਪੰਜਾਬ ਤੇ ਸਿੱਖਾਂ ਲਈ ਨਵਾਂ ਅਧਿਆਏ ਲਿਖੇਗਾ ਟਰੂਡੋ ਦਾ ਪੰਜਾਬ ਦੌਰਾ

ਆਰਥਿਕ ਅਤੇ ਸਾਮਾਜਿਕ ਤੌਰ 'ਤੇ ਪੰਜਾਬ, ਪੰਜਾਬੀਆਂ ਦੀ ਬਦਲੇਗੀ ਤਸਵੀਰ
ਕੈਨੇਡਾ ਵਸੇ ਪੰਜਾਬੀ ਟਰੂਡੋ ਦੇ ਪੰਜਾਬ ਦੌਰੇ 'ਤੇ ਬਾਗੋਬਾਗ

ਜੈ ਸਿੰਘ ਛਿੱਬਰ, ਚੰਡੀਗੜ੍ਹ :
ੈਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਭਾਰਤ ਦੌਰੇ ਖਾਸਕਰਕੇ ਪੰਜਾਬ ਦੌਰੇ ਨੂੰ ਲੈ ਕੇ ਸਿਆਸਤ ਭਖ਼ੀ ਹੋਈ ਹੈ। ਸਾਰੀਆਂ ਸਿਆਸੀ ਧਿਰਾਂ ਰਾਜਸੀ ਲਾਹਾ ਲੈਣ ਲਈ ਇਕ ਦੂਸਰੇ 'ਤੇ ਦੋਸ਼ ਲਗਾਕੇ ਮੇਹਣੋ ਮੇਹਣੀ ਹੋ ਰਹੀਆਂ ਹਨ।
ਪਰ ਸੱਤ ਸਮੁੰਦਰ ਪਾਰ ਕੈਨੇਡਾ ਦੀ ਧਰਤੀ 'ਤੇ ਵਸੇ ਪੰਜਾਬੀਆਂ ਨੂੰ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਪੰਜਾਬ ਦੌਰੇ ਤੋਂ ਵੱਡੀਆਂ ਉਮੀਦਾਂ ਹਨ। ਹਾਲਾਂਕਿ ਕੈਨੇਡਾ ਸਰਕਾਰ ਨੇ ਪਹਿਲਾਂ ਹੀ ਬਹੁਤ ਸਾਰੀਆਂ ਸੁਖ ਸੁਵਿਧਾਵਾਂ, ਸਹੂਲਤਾਂ ਦੇ ਰੱਖੀਆਂ ਹਨ ਪਰੰਤੂ ਫਿਰ ਵੀ ਕਈ ਅਜਿਹੇ ਮਸਲੇ ਹਨ, ਜਿਹਨਾਂ ਦੇ ਹੱਲ ਹੋਣ ਤੇ ਰਾਹਤ ਮਿਲਣ ਦੀ ਉਮੀਦ ਹੈ। ਪੰਜਾਬੀ ਜਾਗਰਣ ਵਲੋਂ ਪ੍ਰਧਾਨ ਮੰਤਰੀ ਦੇ ਦੌਰੇ ਨਾਲ ਕੈਨੇਡਾ ਰਹਿੰਦੇ ਪੰਜਾਬੀਆਂ ਨੂੰ ਕੀ ਫਾਈਦਾ ਹੋਵੇਗਾ ਅਤੇ ਉਹ ਦੌਰੇ ਨੂੰ ਕਿਸ ਨਾਲ ਨਜ਼ਰੀਆ ਨਾਲ ਦੇਖਦੇ ਹਨ। ਵਿਦਿਆਰਥੀ, ਕਾਰੋਬਾਰੀ ਤੇ ਕੈਨੇਡਾ ਸਰਕਾਰ ਦੇ ਮੁਲਾਜ਼ਮ ਨਾਲ ਫੋਨ 'ਤੇ ਕੀਤੀ ਗੱਲਬਾਤ ਦੇ ਅੰਸ਼ :-

ਕਰੀਬ ਪੰਦਰਾਂ ਵਰ੍ਹੇ ਪਹਿਲਾਂ ਸਹਿਕਾਰੀ ਖੰਡ ਮਿੱਲ ਮੋਰਿੰਡਾ ਤੋਂ ਜੂਨੀਅਰ ਇੰਜੀਨਿਅਰ (ਜੇਈ) ਦੀ ਨੌਕਰੀ ਛੱਡ ਪਰਿਵਾਰ ਸਮੇਤ (ਸਰੀ) ਕੈਨੇਡਾ ਪ੍ਰਵਾਸ ਕਰਨ ਵਾਲੇ ਬਰਜਿੰਦਰ ਸਿੰਘ ਜੇਈ ਦਾ ਕਹਿਣਾ ਹੈ ਕਿ ਜਸਟਿਨ ਟਰੂਡੋ ਦੇ ਦੌਰੇ ਨਾਲ ਕੈਨੇਡਾ ਦਾ ਰੰਗ ਰੂਪ, ਮਾਹੌਲ ਬਦਲੇਗਾ ਅਤੇ ਪੰਜਾਬੀਆਂ ਲਈ ਨਵੇਂ ਰਾਹ ਖੁੱਲਣਗੇ। ਉਹਨਾਂ ਦਾ ਕਹਿਣਾ ਹੈ ਕਿ ਟਰੂਡੋ ਪਹਿਲੇ ਪ੍ਰਧਾਨ ਮੰਤਰੀ ਹਨ, ਜਿਹਨਾਂ ਨੇ ਸਿੱਖਾਂ, ਪੰਜਾਬੀਆਂ ਨੂੰ ਵੱਡੀ ਤਰਜੀਹ ਦਿੱਤੀ ਹੈ ਅਤੇ ਕੈਬਨਿਟ ਵਿਚ ਚਾਰ ਪੰਜਾਬੀਆਂ ਨੂੰ ਵਜੀਰ ਵਜੋਂ ਸ਼ਾਮਲ ਕੀਤਾ ਹੈ। ਕਾਮਾਗਾਟਾ ਮਾਰੂ ਘਟਨਾਂ 'ਤੇ ਮਾਫੀ ਮੰਗੀ ਹੈ। ਇਹੀ ਨਹੀਂ ਇਜਰਾਈਲ ਤੋਂ ਵੈਨਕੂਵਰ ਪ੍ਰਵਾਸ ਕਰਨ ਵਾਲੇ ਇਜਰਾਲੀਆਂ ਨੂੰ ਘਰ ਦੀ ਛੱਤ ਮੁਹੱਈਆ ਕਰਵਾਈ ਅਤੇ ਹੁਣ ਵੀ ਗੁਜਾਰੇ ਲਈ ਮਾਸਿਕ ਭੱਤਾ ਦਿੱਤਾ ਜਾ ਰਿਹਾ ਹੈ। ਬਰਜਿੰਦਰ ਦਾ ਕਹਿਣਾ ਹੈ ਕਿ ਕੈਨੇਡਾ ਜਾਣ ਲਈ ਲਾੜਿਆ ਵਲੋਂ ਲਾੜੀ ਨੂੰ ਛੱਡਣ, ਵਿਦਿਆਰਥੀਆਂ ਨੂੰ ਪੀ.ਆਰ ਲੈਣ ਲਈ ਕਾਨੂੰਨੀ ਪ੍ਰੀਕ੍ਰਿਆਂ ਹੋਰ ਸੌਖੀ ਹੋਣ ਦੀ ਸੰਭਾਵਨਾਂ ਹੈ।

ਬਰੈਮਟਨ (ਕੈਨੇਡਾ) ਵਿਖੇ ਉਚ ਵਿਦਿਆ ਅਤੇ ਉਜ਼ਵਲ ਭਵਿਖ ਦਾ ਸੁਪਨਾ ਲੈ ਕੇ ਲੱਗਭੱਗ ਸੱਤ ਮਹੀਨੇ ਪਹਿਲਾਂ ਸੱਤ ਸਮੁੰਦਰ ਦੂਰ ਗਏ ਵਿਦਿਆਰਥੀ ਪ੍ਰਭਜੋਤ ਸਹਿਗਲ ਦਾ ਕਹਿਣਾ ਹੈ ਨੌਜਵਾਨ ਪ੍ਰਧਾਨ ਮੰਤਰੀ ਹੋਣ ਕਾਰਨ ਉਹਨਾਂ ਦੀ ਆਧੁਨਿਕ ਸੋਚ ਹੈ। ਸ਼੍ਰੀ ਦਰਬਾਰ ਸਾਹਿਬ ਨਤਮਸਤਕ ਹੋਣ ਅਤੇ ਮੁੱਖ ਮੰਤਰੀ ਨਾਲ ਮੀਟਿੰਗ ਕਰਨ ਤੋਂ  ਬਾਅਦ ਜਿਥੇ ਸ੍ਰੀ ਟਰੂਡੋ ਨੂੰ ਸਿੱਖ ਧਰਮ ਦੀ ਮਹੱਤਤਾਂ ਦਾ ਪਤਾ ਲੱਗੇਗਾ ਉਥੇ ਕੈਨੇਡਾ ਆਉਣ ਲਈ ਪੰਜਾਬੀਆਂ ਨੂੰ ਆ ਰਹੀਆਂ ਮੁਸ਼ਕਲਾਂ ਤੋਂ ਜਾਣੂ ਹੋਣਗੇ। ਪ੍ਰਭਜੋਤ ਦਾ ਕਹਿਣਾ ਹੈ ਕਿ ਵਿਦਿਆਰਥੀਆਂ ਨੂੰ ਜਲਦੀ ਪੀ.ਆਰ ਮਿਲਣ ਅਤੇ ਮਾਂ -ਬਾਪ ਨੂੰ ਮਲਟੀਪਰਪਜ਼ ਵੀਜਾ ਲੱਗਣ /ਮਿਲਣ ਦੀਆਂ ਬਹੁਤ ਉਮੀਦਾ ਹਨ। ਉਹਨਾਂ ਦਾ ਕਹਿਣਾ ਹੈ ਕਿ ਨੌਜਵਾਨ ਪ੍ਰਧਾਨ ਮੰਤਰੀ ਹੋਣ ਕਰਕੇ ਉਹਨਾਂ ਦੀ ਸੋਚ ਕਾਫੀ ਅਗਾਂਹਵਧੂ ਹੈ।
ਹ ਸਾਲ ਪਹਿਲਾਂ ਪ੍ਰਵਾਸ ਕਰ ਕੈਨੇਡਾ ਗਏ ਅਤੇ ਕੈਨੇਡੀਅਨ ਪੁਲਿਸ (ਗਵਰਨਮੈਂਟ ਆਫ ਐਲਬਰਟਾ ਇੰਪਲਾਈਜ਼) ਜਤਿੰਦਰ ਸਿੰਘ ਭੁੱਲਰ ਦਾ ਕਹਿਣਾ ਹੈ ਕਿ ਜਸਟਿਨ ਟਰੂਡੋ ਨੇ ਪਹਿਲਾਂ ਹੀ ਕਾਨੂੰਨੀ ਪ੍ਰੀਕ੍ਰਿਆਂ ਨੂੰ ਬਹੁਤ ਸਰਲ ਕਰ ਦਿੱਤਾ ਹੈ। ਨਵੇਂ ਨਿਯਮਾਂ ਅਨੁਸਾਰ ਵਿਅਕਤੀ ਵਲੋਂ ਤਿੰਨ ਸਾਲ ਕੈਨੇਡਾ ਸਰਕਾਰ ਨੂੰ ਆਮਦਨ ਟੈਕਸ ਅਦਾ ਕੀਤਾ ਹੈ, ੁਉਹ ਆਪਣੇ ਮਾਂ ਬਾਪ ਨੂੰ ਕੈਨੇਡਾ ਬੁਲਾ ਸਕਦਾ ਹੈ। ਇਸ ਤੋਂ ਇਲਾਵਾ ਵੱਡੀ ਗਿਣਤੀ ਵਿਚ ਨੌਜਵਾਨਾਂ ਨੂੰ ਸਿੱਖਿਆ ਹਾਸਲ ਕਰਨ ਦਾ ਵੱਡਾ ਮੌਕਾ ਦਿੱਤਾ ਹੈ। ਭੁੱਲਰ ਅਨੁਸਾਰ ਟਰੂਡੋ ਕੈਬਨਿਟ ਵਿਚ ਚਾਰ ਮੰਤਰੀ ਸ਼ਾਮਲ ਹਨ, ਇਸੀ ਤਰ੍ਹਾਂ ਮੌਜੂਦਾ ਸਰਕਾਰ ਵਿਚ ਡੇਢ ਦਰਜਨ ਦੇ ਕਰੀਬ ਸਾਂਸਦ ਹਨ। ਉਹਨਾਂ ਦਾ ਕਹਿਣਾ ਹੈ ਕਿ ਕੈਨੇਡਾ ਵਿਚ ਬੋਲਣ, ਕਹਿਣ ਦੀ ਪੂਰੀ ਆਜ਼ਾਦੀ ਹੈ ਫਿਰ ਵੀ ਸਿੱਖ ਧਰਮ ਬਾਰੇ ਜਾਣਕਾਰੀ ਹਾਸਲ ਕਰਨ ਤੋਂ ਬਾਅਦ ਸਿੱਖਾਂ ਪ੍ਰਤੀ ਰਵੱਈਆਂ ਬਦਲੇਗਾ। ਇਸੀ ਤਰ੍ਹਾਂ ਨਿਵੇਸ਼ ਕਰਨ ਨਾਲ ਪੰਜਾਬ ਦੀ ਆਰਥਿਕ ਦਸ਼ਾਂ ਵਿਚ ਵੀ ਸੁਧਾਰ ਹੋਵੇਗਾ।


ਟਰਾਂਸਪੋਰਟ ਕਾਰੋਬਾਰ ਨਾਲ ਜੁੜੇ ਚਰਨਜੀਤ ਸਿੰਘ ਦਾ ਕਹਿਣਾ ਹੈ ਕਿ ਜਸਟਿਨ ਟਰੂਡੋ ਮੂਲ ਰੂਪ ਵਿਚ ਬਹੁਤ ਵਧੀਆ ਇਨਸਾਨ ਹੈ। ਪ੍ਰਧਾਨ ਮੰਤਰੀ ਦੁਆਰਾ  ਹਰੇਕ ਭਾਈਚਾਰੇ ਦਾ ਸਤਿਕਾਰ ਕੀਤਾ ਜਾਂਦੇ। ਕੈਨੇਡਾ ਵਿਚ ਗੰਨਮੈਨ ਕਲਚਰ ਨਹੀਂ ਹੈ। ਪੰਜਾਬ ਦੇ ਸਿਆਸੀ ਆਗੂਆਂ ਨੂੰ ਪ੍ਰਧਾਨ ਮੰਤਰੀ ਟਰੂਡੋ ਤੋਂ ਸਬਕ ਸਿੱਖਣਾ ਚਾਹੀਦਾ ਹੈ। ਉਹਨਾਂ ਕਿਹਾ ਕਿ ਪਹਿਲੀ ਵਾਰ ਇਮੀਗਰੇਸ਼ਨ ਦੇ ਨਿਯਮਾਂ ਵਿਚ ਵੱਡੀ ਢਿਲ ਦਿੱਤੀ  ਗਈ ਹੈ ਅਤੇ ਐਜੂਕੇਸ਼ਨ ਵੀਜੇ 'ਤੇ ਗਏ ਵਿਦਿਆਰਥੀਆਂ ਨੂੰ ਆਪਣੇ ਮਾਂ ਬਾਪ ਨੂੰ ਬਲਾਉਣ ਲਈ ਨਿਯਮ ਸੌਖੇ ਕੀਤੇ ਗਏ ਹਨ। ਇਸੀ ਤਰ੍ਹਾਂ ਨਸਲੀ ਹਿੰਸਾਂ ਰੋਕਣ ਲਈ ਸਿੱਖਾਂ ਨੂੰ ਵੱਖਰੀ ਪਹਿਚਾਣ ਦਿੱਤੀ ਜਾ ਰਹੀ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਪੰਜਾਬੀ ਭਾਈਚਾਰੇ ਤੇ ਪੰਜਾਬ ਨੂੰ ਜਸਟਿਨ ਟਰੂਡੋ ਦੇ ਦੌਰੇ ਦਾ ਆਰਥਿਕ ਤੇ ਸਮਾਜਿਕ ਤੌਰ 'ਤੇ ਕਾਫੀ ਲਾਭ ਮਿਲੇਗਾ।