ਸਿਆਸਤਦਾਨਾਂ ਤੇ ਅਫ਼ਸਰਾਂ ਦੀ ਜੋਤਸ਼ੀਆਂ 'ਤੇ ਟੇਕ

ਪੰਜਾਬੀ ਜਾਗਰਣ ਵਿਸ਼ੇਸ਼ ----

ਜੈ ਸਿੰਘ ਛਿੱਬਰ, ਚੰਡੀਗੜ੍ਹ :

ਵਿਸ਼ਵ ਭਰ ਵਿਚ ਸਾਇੰਸ ਨੇ ਨਵੀਆਂ ਖੋਜ਼ਾਂ, ਕਾਢਾਂ ਰਾਹੀ ਮਨੁੱਖ ਨੂੰ ਧਰਤੀ ਤੋਂ ਚੰਨ ਤੱਕ ਪਹੁੰਚਾ ਦਿੱਤਾ ਹੈ। ਪਰ ਅਜੋਕੇ ਸਮੇਂ ਵਿਚ ਵੀ ਲੋਕ ਵਹਿਮਾਂ, ਭਰਮਾਂ, ਜੋਤਸ਼ੀਆਂ, ਤਾਂਤਰਿਕਾਂ ਦੇ ਚੱਕਰ ਵਿਚੋਂ ਬਾਹਰ ਨਹੀਂ ਨਿਕਲ ਰਹੇ। ਅਨਪੜ੍ਹ, ਗਰੀਬ ਲੋਕਾਂ ਦੀ ਗੱਲ ਤਾਂ ਛੱਡੋ ਪੜ੍ਹੇ ਲਿਖੇ, ਗਿਆਨ, ਵਿਗਿਆਨ ਦੀ ਸਮਝ ਰੱਖਣ ਵਾਲੇ ਲੋਕ, ਸਿਆਸੀ ਆਗੂ, ਉਚ ਅਧਿਕਾਰੀ ਵੀ ਜੋਤਸ਼ੀਆਂ ਦੇ ਕਲਾਵੇ ਵਿਚ ਫਸੇ ਹੋਏ ਹਨ। 
ਕੈਪਟਨ ਸਰਕਾਰ ਦੇ ਕਈ ਮੰਤਰੀ ਅਤੇ ਪੰਜਾਬ ਸਰਕਾਰ ਦੇ ਅਧਿਕਾਰੀ ਆਪਣੀ ਰੋਜ਼ਮਰਾ ਦੀ ਜਿੰਦਗੀ ਦਾ ਸ਼ੁਭ ਆਰੰਭ ਅਸਤੂ ਵਸਤੂ ਜਾਂ ਜੋਤਸ਼ੀਆਂ ਦੇ ਮੁਤਾਬਕ ਕਰਦੇ ਹਨ।  ਤਕਨੀਕੀ ਸਿੱਖਿਆ ਵਿਭਾਗ ਦੇ ਵਜ਼ੀਰ ਚਰਨਜੀਤ ਸਿੰਘ ਚੰਨੀ ਦੀ ਸੱਤਾ ਦੇ ਗਲਿਆਰਿਆ ਵਿਚ ਸੱਭ ਨਾਲੋਂ ਵੱਧ ਚਰਚਾ ਹੋ ਰਹੀ ਹੈ। ਸ੍ਰ ਚੰਨੀ ਨੇ ਮੰਤਰੀ ਬਣਨ ਤੋਂ ਬਾਅਦ ਪਹਿਲਾਂ ਸੈਕਟਰ ਦੋ ਸਥਿਤ ਆਪਣੀ ਸਰਕਾਰੀ ਕੋਠੀ ਦੇ ਅੱਗੇ ਪਾਰਕ ਵਿਚ ਚੜਦੇ ਵਾਲੇ ਪਾਸੇ ਨੂੰ ਸੜਕ ਬਣਾਉਣ ਦਾ ਕੰਮ ਸ਼ੁਰੂ ਕੀਤਾ। ਸੜਕ ਬਣਾਉਣ ਦਾ ਕੰਮ ਚੱਲ ਹੀ ਰਿਹਾ ਸੀ ਕਿ ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਸੜਕ ਬੰਦ ਕਰਵਾ ਦਿੱਤੀ। ਇਸਤੋਂ ਬਾਅਦ ਚੰਨੀ ਵਲੋਂ ਹਾਥੀ ਦੀ ਸਵਾਰੀ ਕਰਨ ਦੀਆਂ ਫੋਟੋਆਂ ਅਖ਼ਬਾਰਾਂ ਤੇ ਸੋਸ਼ਲ ਮੀਡੀਆਂ 'ਤੇ ਨਸ਼ਰ ਹੋਈਆ। ਹੁਣ ਤਾਜ਼ੀ ਘਟਨਾ ਅਨੁਸਾਰ ਚੰਨੀ ਨੇ ਸਿਵਲ ਸਕੱਤਰੇਤ ਸਥਿਤ ਆਪਣੇ ਦਫ਼ਤਰ ਦੇ ਬਾਹਰ ਲੱਗੀ ਕਾਲੇ ਰੰਗ ਦੀ ਨੇਮ ਪਲੇਟ ਬਦਲਣ ਦੇ ਆਦੇਸ਼ ਦਿੱਤੇ ਸਨ। ਜਿਸ ਤਹਿਤ ਸਬੰਧਿਤ ਵਿਭਾਗੀ ਅਧਿਕਾਰੀਆਂ ਨੇ ਕਾਲੇ ਰੰਗ ਦੀ ਬਜਾਏ ਕਰੀਮ ਰੰਗ ਦੀ ਪਲੇਟ 'ਤੇ ਸੁਨਹਿਰੇ ਅੱਖਰਾਂ ਵਿਚ ਨਾਮ ਲਿਖਵਾਕੇ ਪਲੇਟ ਲਗਵਾਈ ਹੈ। 
ਇਸੀ ਤਰ੍ਹਾਂ ਸਥਾਨਕ ਸਰਕਾਰਾਂ ਵਿਭਾਗ ਦੇ ਮੰਤਰੀ ਨਵਜੋਤ ਸਿੰਘ ਸਿੱਧੂ ਆਪਣੇ ਘਰ ਵਿਚ ਹਵਨ ਹੀ ਨਹੀਂ ਕਰਦੇ , ਬਲਕਿ ਉਹਨਾਂ ਆਪਣੇ ਸਰੀਰ ਦੇ ਵੱਖ ਵੱਖ ਭਾਗਾਂ 'ਤੇ ਵੱਡੇ ਕੀਮਤੀ ਰੁਦਰਖਸ਼ ਦੀ ਮਾਲਾ, ਗੁੱਟਾਂ 'ਤੇ ਮੌਲੀਆਂ ਅਤੇ ਉਂਗਲੀਆਂ ਵਿਚ ਕੀਮਤੀ ਨੱਗ ਵੀ ਪਾਏ ਹੋਏ ਹਨ। ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਵੀ ਆਪਣੇ ਗੁੱਟ 'ਤੇ ਲਾਲ ਪੀਲੇ ਰੰਗ ਦੀ ਮੌਲੀ ਬੰਨਕੇ ਰੱਖਦੇ ਹਨ। ਇਸੀ ਤਰ੍ਹਾਂ ਕਈ ਹੋਰ ਮੰਤਰੀਆਂ, ਉਚ ਅਧਿਕਾਰੀਆਂ ਵਲੋਂ ਵੀ ਨਗ ਵਾਲੀਆਂ ਮੁੰਦੀਆਂ ਪਾਈਆਂ ਹੋਈਆਂ ਹਨ। 
ਜੋਤਸ਼ੀ, ਤਾਂਤਰਿਕ ਦੇ ਚੱਕਰ ਵਿਚ ਕਾਂਗਰਸੀ ਆਗੂ ਹੀ ਫਸੇ ਨਹੀਂ ਬਲਕਿ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ,  ਸਾਬਕਾ ਮੁੱਖ ਮੰਤਰੀ ਪਰਕਾਸ਼ ਸਿੰਘ ਬਾਦਲ, ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਸਮੇਤ ਕਈ ਅਕਾਲੀ ਆਗੂਆਂ ਵਲੋਂ ਜੋਤਸ਼ੀਆਂ ਦਾ ਅਸ਼ੀਰਵਾਦ ਲਿਆ ਜਾਂਦਾ ਹੈ। ਚੰਡੀਗੜ੍ਹ ਦੇ ਨਾਲ ਲੱਗਦੇ ਇਕ ਹਲਕੇ ਦਾ ਅਕਾਲੀ ਆਗੂ ਪਿਛਲੇ ਕਈ ਸਾਲਾਂ ਤੋਂ ਹਰੇਕ ਵੀਰਵਾਰ ਨੂੰ ਤੜਕੇ ਉਠਕੇ ਕੀਰਤਪੁਰ ਸਾਹਿਬ ਸਥਿਤ ਇਕ ਮਜਾਰ 'ਤੇ ਹਾਜ਼ਰੀ ਲਗਵਾਉਂਦਾ ਹੈ। 
ਅਤਿ ਭਰੋਸੇਯੋਗ ਸੂਤਰਾਂ ਤੋਂ  ਪਤਾ ਲੱਗਿਆ ਹੈ ਕਿ ਪੰਜਾਬ ਸਰਕਾਰ ਦੇ ਕਈ ਮੰਤਰੀ, ਸਲਾਹਕਾਰ ਅਤੇ ਕਈ ਉਚ ਅਧਿਕਾਰੀ ਹਿਮਾਚਲ ਪ੍ਰਦੇਸ਼ ਬਗਲਾ ਮੁਖੀ ਜਾਦੂ ਕਰਵਾਉਣ ਲਈ ਜਾਂਦੇ ਹਨ। ਕਈ ਅਧਿਕਾਰੀਆਂ ਵਲੋਂ ਆਪਣੇ ਦਫ਼ਤਰਾਂ ਵਿਚ ਬੈਠਣ ਦੀ ਸਥਿਤੀ ਭਾਵ ਮੇਜ਼ ਕੁਰਸੀਆਂ ਦੀ ਦਿਸ਼ਾ ਅਤੇ ਪਰਦਿਆਂ ਦਾ  ਰੰਗ ਵਸਤੂ ਸ਼ਾਸਤਰ ਮੁਤਾਬਿਕ ਕੀਤਾ ਹੋਇਆ ਹੈ। ਹੁਣ ਸਵਾਲ ਪੈਦਾ ਹੁੰਦਾ ਹੈ ਕਿ ਲੋਕਾਂ ਲਈ ਚਾਨਣ ਮੁਨਾਰਾ ਬਣਨ ਵਾਲੇ ਲੋਕ ਜੇਕਰ ਅੰਧ ਵਿਸ਼ਵਾਸ਼ ਵਿਚ ਡੁੱਬੇ ਹੋਏ ਹਨ ਤਾਂ ਆਮ ਸਾਧਾਰਨ ਲੋਕਾਂ ਦਾ ਕੀ ਹਾਲ ਹੋਵੇਗਾ। 

ਕੀ ਕਹਿੰਦੇ ਹਨ ਤਰਕਸ਼ੀਲ --
ਤਰਕਸ਼ੀਲ ਸੁਸਾਇਟੀ ਦੇ ਮੀਡੀਆ ਮੁੱਖੀ ਸਤਨਾਮ ਦਾਊਂ ਦਾ ਕਹਿਣਾ ਹੈ ਕਿ 
ਸਰਕਾਰੀ ਅਫਸਰਾਂ ਅਤੇ ਮੰਤਰੀਆਂ ਦਾ ਅੰਧ ਵਿਸ਼ਵਾਸ ਵਿੱਚ ਗ੍ਰਸੇ ਹੋਣਾ ਚਿੰਤਾ ਦਾ ਵਿਸ਼ਾ ਹੈ। ਉਹਨਾਂ ਕਿਹਾ ਕਿ ਮੰਤਰੀ ਅੰਧ ਵਿਸ਼ਵਾਸ ਫੈਲਾਉਣ ਦਾ ਕੰਮ ਕਰ ਰਹੇ ਹਨ। ਦਾਉਂ ਦਾ ਕਹਿਣਾ ਹੈ ਕਿ ਕੁੱਝ ਸਾਲ ਪਹਿਲਾ ਕੈਪਟਨ ਅਮਰਿੰਦਰ ਸਿੰਘ ਪਟਿਆਲੇ ਸ਼ਹਿਰ ਨੂੰ ਹੜ੍ਹਾਂ ਦੀ ਕਰੋਪੀ ਤੋਂ ਬਚਾਉਣ ਲਈ ਨਦੀ ਨੂੰ ਨੱਥ ਅਤੇ ਹੋਰ ਗਹਿਣੇ ਭੇਟ ਕਰ ਚੁੱਕੇ ਹਨ, ਸਾਬਕਾ ਮੁੱਖ ਮੰਤਰੀ ਰਜਿੰਦਰ ਕੌਰ ਭੱਠਲ ਮੀਂਹ ਰੋਕਣ ਲਈ ਖਿਡੌਣਾ ਗੁਡੀ ਫ਼ੂਕ ਚੁੱਕੀ ਹੈ। 
ਉਹਨਾਂ ਕਿਹਾ ਕਿ ਅਧਿਕਾਰੀ ਤੇ ਸਿਆਸੀ ਆਗੂ ਵਸਤੂ ਸ਼ਾਸਤਰ ,ਜੋਤਿਸ਼, ਅਤੇ ਟੂਣੇ ਆਦਿ ਦੇ ਅੰਧਵਿਸ਼ਵਾਸਾਂ ਕਾਰਨ ਸਰਕਾਰੀ ਸੰਪਤੀ ਦੀ ਤੋੜ-ਭੰਨ ਕਰਕੇ ਲੋਕਾਂ ਵਿੱਚ ਅੰਧ-ਵਿਸ਼ਵਾਸ ਫੈਲਾ ਰਹੇ ਹਨ। ਉਹਨਾਂ ਕਿਹਾ ਕਿ ਡਰੱਗਜ਼ ਐਂਡ ਮੈਜਿਕ ਰਮੇਡੀਜ਼ ਐਕਟ  ਜਾਦੂ ਟੂਣੇ ਜਾਂ ਅੰਧ ਵਿਸ਼ਵਾਸ਼ ਨੂੰ ਰੋਕਣ ਲਈ ਬਹੁਤਾ ਕਾਰਗਾਰ ਸਾਬਿਤ ਨਹੀਂ ਹੋ ਰਿਹਾ। ਤਰਕਸ਼ੀਲ ਆਗੂ ਨੇ ਦੱਸਿਆ ਕਿ ਮਹਾਰਾਸ਼ਟਰ ਸਰਕਾਰ ਵਲੋਂ ਬਣਾਏ ਗਏ ਕਾਨੂੰਨ ਦੇ ਅਧਾਰ ਤੇ ਤਰਕਸ਼ੀਲ ਸੁਸਾਇਟੀ ਪੰਜਾਬ ਨੇ ਖਰੜਾ ਲਿਖ ਕੇ ਪਿਛਲੀ ਸਰਕਾਰ ਦੇ ਸਾਰੇ ਐਮ ਐਲ ਏਜ ਨੂੰ ਦਿੱਤਾ ਸੀ ਪਰ ਕਿਸੇ ਵੀ ਐਮ ਐਲ ਏ ਨੇ ਇਸ ਕਨੂੰਨ ਤੇ ਕੋਈ ਚਰਚਾ ਨਹੀਂ ਕੀਤੀ। ਉਹਨਾਂ ਕਿਹਾ ਕਿ ਜਾਦੂ ਟੂਣੇ , ਤਾਂਤਰਿਕਾਂ ਦਾ ਸਹਾਰਾ ਲੈਣ ਵਾਲੇ ਲੋਕ ਇਕ ਤਰ੍ਹਾਂ ਮਾਨਸਿਕ ਰੋਗੀ ਹੁੰਦੇ ਹਨ।