ਥਾਣੇਦਾਰ ਦੇ ਨਾਮ 'ਤੇ ਰਿਸ਼ਵਤ ਲੈਣ ਵਾਲਾ ਮੰਤਰੀ ਦਾ ਕਰਮਚਾਰੀ ਚਰਚਾਵਾਂ 'ਚ

ਚੰਡੀਗੜ 1 ਜੁਲਾਈ (ਜੈ ਸਿੰਘ ਛਿੱਬਰ)। ਪੰਜਾਬ ਦੇ ਇਕ ਕੈਬਨਿਟ ਮੰਤਰੀ ਦਾ ਪੀ.ਏ ਕਮ ਦਫਤਰ ਸਕੱਤਰ ਥਾਣੇਦਾਰ ਦੇ ਨਾਮ 'ਤੇ 15 ਹਜ਼ਾਰ ਰੁਪਏ ਦੀ ਰਿਸ਼ਵਤ ਲੈਣ ਕਾਰਨ ਸਿਆਸੀ ਗਲਿਆਰਿਆ ਵਿਚ ਚਰਚਾਂ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਉਕਤ ਦਫਤਰੀ ਸਕੱਤਰ ਨੇ ਜਿਲ•ਾਂ ਰੋਪੜ ਦੇ ਇਕ ਪਿਲਸ ਥਾਣੇ ਦੇ ਥਾਣੇਦਾਰ ਦੇ ਨਾਂਅ 'ਤੇ 15 ਹਜਾਰ ਰੁਪਏ ਲੈ ਲਏ। ਇਹ 'ਸੇਵਾ' ਉਸਨੇ ਇਕ ਵਿਅਕਤੀ ਪਾਸੋਂ ਧਾਰਾ 307 ਲਗਵਾਉਣ ਦੇ ਨਾਮ 'ਤੇ ਕਥਿੱਤ ਤੌਰ 'ਤੇ ਲਈ ਸੀ। ਭੇਤ ਉਦੋਂ ਖੁੱਲਿਆ ਜਦ ਰਕਮ ਦੇਣ ਵਾਲੇ ਵਿਅਕਤੀ ਨੇ ਹੱਕ ਨਾਲ ਥਾਣਾ ਇੰਚਾਰਜ ਨੂੰ ਦੂਜੀ ਪਾਰਟੀ ਵਿਰੁੱਧ ਧਾਰਾ 307 ਦਾ ਮੁੱਕਦਮਾ ਦਰਜ ਕਰਨ ਲਈ ਕਿਹਾ ਤਾਂ ਥਾਣੇਦਾਰ ਉਸਦੀ ਦਬਾਅ ਵਾਲੀ ਗੱਲ ਤੋਂ ਚਿੜ ਗਿਆ। ਇਸੇ ਦੌਰਾਨ ਵਿਅਕਤੀ ਨੇ ਥਾਣੇਦਾਰ ਦੇ ਕੰਨ ਵਿਚ 'ਸੇਵਾ-ਪਾਣੀ ਹੋਣ ਦੀ ਗੱਲ ਕਹਿ ਦਿੱਤੀ। ਫਿਰ ਤਾਂ ਸਾਰਾ ਭੇਦ ਹੀ ਖੁੱਲ ਗਿਆ। ਸਥਿਤੀ ਏਥੋਂ ਤਕ ਪੁੱਜੀ ਕਿ ਥਾਣਾ ਇੰਚਾਰਜ ਨੇ ਮੰਤਰੀ ਦੇ ਦਫਤਰੀ ਸਕੱਤਰ ਨੂੰ ਘੇਰੇ ਵਿਚ ਲੈ ਲਿਆ। ਆਖਿਰਕਾਰ ਮੰਤਰੀ ਦੇ ਉਸ ਦਫਤਰੀ ਸਕੱਤਰ ਨੂੰ ਲਈ 15 ਹਜਾਰ ਰੁਪਏ ਦੀ ਰਾਸ਼ੀ ਮੋੜਨੀ ਪਈ। ਕਿੱਸਾ ਇਹ ਸੀ ਕਿ ਇਕ ਪਿੰਡ 'ਚ ਦੋ ਧੜਿਆ ਦੀ ਲੜਾਈ ਹੋ ਗਈ। ਪੁਲਿਸ ਨੇ ਇਕ ਪਾਰਟੀ ਵਿਰੁੱਧ ਦਾ ਮੁਕੱਦਮਾ ਦਰਜ ਕਰ ਲਿਆ,ਪਰ ਦੂਜੀ ਪਾਰਟੀ ਨੇ  ਵੀ ਬਰਾਬਰ ਪੁਲਿਸ ਮੁਕੱਦਮਾ ਦਰਜ ਕਰਵਾਉਣ ਲਈ ਮੰਤਰੀ ਦੇ ਉਸ ਦਫਤਰੀ ਸਕੱਤਰ ਤਕ ਪਹੁੰਚ ਕੀਤੀ। ਇਸ ਰਿਸ਼ਵਤ ਵਾਲੀ ਕਹਾਣੀ ਦਾ ਰੌਲਾ ਪੈ ਗਿਆ ਅਤੇ ਜੰਗਲ ਦੀ ਅੱਗ ਵਾਂਗ ਇਹ ਗੱਲ ਸਿਆਸੀ ਪਿੜ ਵਿਚ ਫੈਲ ਗਈ। ਸਿਆਸੀ ਹਲਕਿਆਂ 'ਚ ਰਿਸ਼ਵਤ ਲੈਣ ਦੀ ਚਰਚਾ ਨਾਲ ਹੁਣ ਮੰਤਰੀ ਵਲੋਂ ਲੋਕਾਂ 'ਚ ਇਹ ਸਫਾਈ ਦਿੱਤੀ ਜਾ ਰਹੀ ਹੈ ਕਿ ਥਾਣੇਦਾਰ ਵਲੋਂ ਪੈਸੇ ਦੀ ਮੰਗ ਕੀਤੀ ਗਈ ਸੀ, ਤੇ ਉਸਨੇ ਥਾਣੇਦਾਰ ਵਲੋਂ ਪੈਸੇ ਵਾਪਸ ਕਰਵਾਏ ਹਨ। ਬਾਅਦ ਵਿੱਚ ਮੰਤਰੀ ਨੇ ਆਪਣਾ ਅਸਰ ਰਸੂਖ ਵਰਤਿਆਂ ਦੂਜੀ ਧਿਰ 'ਤੇ ਵੀ ਕਰਾਸ ਪਰਚਾ ਦਰਜ ਕਰਵਾ ਦਿੱਤਾ। ਦੱਸਿਆਂ ਜਾਂਦਾ ਹੈ ਕਿ ਮੰਤਰੀ ਅਤੇ ਉਸਦੇ ਕਈ ਅਤਿ ਨਜ਼ਦੀਕੀ ਉਸ ਕਰਮਚਾਰੀ ਤੋਂ ਕਾਫੀ ਖਫ਼ਾ ਹਨ।