ਬੀ.ਏ ਦੀ ਡਿਗਰੀ ਨਹੀਂ, ਪਰ ਐਮ.ਏ ਪਾਸ, ਡਿਗਰੀ ਨੇ ਪੀ.ਸੀ.ਐਸ. ਦੀ ਨੌਕਰੀ ਗੁਆਈ

ਚੰਡੀਗੜ• 23 ਜੂਨ ( ਜੈ ਸਿੰਘ ਛਿੱਬਰ) : ਵਿਭਾਗੀ ਤਰੱਕੀ ਰਾਹੀਂ ਪੀ.ਸੀ.ਐਸ.(ਪੰਜਾਬ ਸਿਵਲ ਸਰਵਿਸਿਜ) ਪ੍ਰੀਖਿਆ ਪਾਸ  ਕਰਨ ਵਾਲਾ ਸਿਵਲ ਸਕੱਤਰੇਤ 'ਚ ਤਾਇਨਾਤ  ਸੀਨੀਅਰ ਸਹਾਇਕ ਰਮਨ ਕੁਮਾਰ ਬੀ.ਏ ਦੀ ਡਿਗਰੀ ਨੂੰ ਲੈ ਕੇ ਕਸੂਤੀ ਸਥਿਤੀ ਵਿੱਚ ਫਸ ਗਿਆ ਹੈ। ਦਿਲਚਸਪ ਗੱਲ ਇਹ ਹੈ ਕਿ ਉਕਤ ਅਧਿਕਾਰੀ ਕੋਲ• ਐਮ.ਏ. (ਮਾਸਟਰ ਆਫ ਆਰਟਸ) ਦੀ ਡਿਗਰੀ ਤਾਂ ਹੈ, ਪਰ ਪੰਜਾਬ ਪਬਲਿਕ ਸਰਵਿਸਿਜ ਕਮਿਸ਼ਨ ਕੋਲ• ਬੀ.ਏ ਦੀ ਡਿਗਰੀ ਪੇਸ਼ ਨਹੀਂ ਕਰ ਸਕਿਆ। ਮਾਮਲਾ ਸ਼ੱਕੀ ਹੋਣ ਕਰਕੇ ਪਬਲਿਕ ਸਰਵਿਸਿਜ ਕਮਿਸ਼ਨ ਨੇ ਪੰਜਾਬ ਸਰਕਾਰ ਨੂੰ ਮਾਮਲੇਂ ਨੂੰ ਮੁੜ ਵਿਚਾਰਨ ਲਈ ਕਿਹਾ ਹੈ। ਇਸਤੋਂ ਬਾਦ ਪ੍ਰਸੋਨਲ ਵਿਭਾਗ ਨੇ ਅਗਲੇਰੀ ਕਾਰਵਾਈ ਲਈ ਸਕੱਤਰ ਲੀਗਲ (ਐਲ.ਏ.) ਤੋਂ ਕਾਨੂੰਨੀ ਰਾਏ ਮੰਗੀ ਹੈ। 
ਉਧਰ ਪ੍ਰੋਸੋਨਲ ਵਿਭਾਗ ਨੇ ਨਵੇਂ ਬਣੇ 24 ਅਧਿਕਾਰੀਆਂ ਨੂੰ ਮੈਗਸੀਪਾ ਵਿਖੇ ਟ੍ਰੇਨਿੰਗ ਲੈਣ ਲਈ ਭੇਜ ਦਿੱਤਾ ਹੈ ਪਰੰਤੂ ਖੁਰਾਕ ਤੇ ਸਪਲਾਈ ਵਿਭਾਗ ਵਿੱਚ ਤਾਇਨਾਤ ਉਕਤ ਸੀਨੀਅਰ ਸਹਾਇਕ ਨੂੰ ਟ੍ਰੇਨਿੰਗ ਲਈ ਨਹੀਂ ਭੇਜਿਆ। ਭੇਦ ਖੁੱਲਣ ਤੋਂ ਬਾਦ ਸਿਵਲ ਸਕੱਤਰੇਤ 'ਚ ਐਮ.ਏ. ਦੀ ਡਿਗਰੀ ਖੂਬ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ। ਜਾਣਕਾਰੀ ਅਨੁਸਾਰ ਪੀ.ਸੀ.ਐਸ. ਲਈ ਬੀ.ਏ ਪਾਸ ਹੋਣਾ ਲਾਜ਼ਮੀ ਹੈ। ਸਵਾਲ ਪੈਦਾ ਹੁੰਦਾ ਹੈ ਕਿ ਜਦੋਂ ਉਕਤ ਅਧਿਕਾਰੀ ਕੋਲ• ਬੀ.ਏ ਦੀ ਡਿਗਰੀ  ਨਹੀਂ ਸੀ ਤਾਂ ਪੰਜਾਬ ਪਬਲਿਕ ਸਰਵਿਸ ਕਮਿਸਨ ਨੂੰ ਪੀ.ਸੀ.ਐਸ.ਪ੍ਰੀਖਿਆ ਲਈ ਕਿਸ ਅਧਾਰ ਪਰ ਨਾਮ ਦੀ ਸਿਫਾਰਸ਼ ਕੀਤੀ ਗਈ। ਦੱਸਿਆਂ ਜਾਂਦਾ ਹੈ ਕਿ ਪੀ.ਸੀ.ਐਸ.ਲਈ ਚੁਣਨ ਵਾਲਾ ਸੀਨੀਅਰ ਸਹਾਇਕ ਕਈ ਸਾਲਾਂ ਤੋਂ ਖੁਰਾਕ ਤੇ ਸਿਵਲ ਸਪਲਾਈ ਵਿਭਾਗ 'ਚ ਟਿਕਿਆ ਹੋਇਆ ਹੈ ਅਤੇ ਸਰਕਾਰ 'ਚ ਸ਼ਾਮਲ ਇੱਕ ਪ੍ਰਭਾਵਸ਼ਾਲੀ ਮੰਤਰੀ ਦਾ ਅਸ਼ੀਰਵਾਦ ਹੋਣਾ ਦੱਸਿਆ ਜਾ ਰਿਹਾ ਹੈ। ਲੀਗਲ ਅਧਿਕਾਰੀ ਨੇ ਕਾਨੂੰਨੀ ਪੱਖ ਹੋਣ  ਕਾਰਨ ਕੁੱਝ ਵੀ ਦੱਸਣ ਤੋਂ ਇਨਕਾਰ ਕਰ ਦਿੱਤਾ ਪਰ ਉਕਤ ਅਧਿਕਾਰੀ ਨੇ ਮੰਨਿਆਂ ਕਿ ਪ੍ਰਸੋਨਲ ਵਿਭਾਗ ਵਲੋਂ ਕਾਨੂੰਨੀ ਪੱਖ ਮੰਗਿਆ ਹੈ। ਖੁਰਾਕ ਤੇ ਸਿਵਲ ਸਪਲਾਈ ਵਿਭਾਗ ਵਿੱਚ ਤਾਇਨਾਤ ਉਕਤ ਸੀਨੀਅਰ ਸਹਾਇਕ ਦਾ ਪੱਖ ਲੈਣ ਲਈ ਕਈ ਬਾਰ ਸੰਪਰਕ ਕੀਤਾ ਪਰੰਤੂ ਸੰਬੰਧਿਤ ਅਧਿਕਾਰੀ ਨੇ ਮੋਬਾਇਲ ਫੋਨ ਤੋਂ ਕੋਈ ਰਿਸਪਾਂਸ ਨਹੀਂ ਦਿੱਤਾ। ਚਰਚਾ ਇਹ ਵੀ ਚੱਲ ਰਹੀ ਹੈ ਕਿ ਡਿਗਰੀ ਨਾ ਹੋਣ ਕਾਰਨ ਉਸਦੀ ਮੌਜੂਦਾ ਨੌਕਰੀ ਵੀ ਖਤਰੇ 'ਚ ਪੈ ਸਕਦੀ ਹੈ। ਵਰਨਣਯੋਗ ਗੱਲ ਇਹ ਹੈ ਕਿ ਕੈਟਾਗਰੀ ਏ ਤਹਿਤ ਸਿਵਲ ਸਕੱਤਰੇਤ 'ਚ ਵੱਖ ਵੱਖ ਵਿਭਾਗ ਵਿੱਚ ਤਾਇਨਾਤ 14 ਅਧਿਕਾਰੀਆਂ ਨੂੰ ਵਿਭਾਗੀ ਤਰੱਕੀ ਰਾਹੀਂ ਪੀ.ਸੀ.ਐਸ ਬਣਨ ਦਾ ਮੌਕਾ ਮਿਲਿਆ ਹੈ।